Gipuzkoako Aldizkari Ofiziala

GIPUZKOAKO FORU ALDUNDIA

EKONOMIA SUSTAPENEKO ETA
PROIEKTU ESTRATEGIKOETAKO DEPARTAMENTUA

Gipuzkoa Digitala: 4.0 Produktu dirulaguntza lerroaren oinarri arautzaile espezifikoak eta 2025eko deialdia.

Diputatuen Kontseiluak honako erabaki hau hartu du 2025eko apirilaren 1(e)ko bilkuran.

Gipuzkoako Foru Aldundiaren 2024-2027 Plan Estrategikoak erronka gisa planteatzen du digitalizazio eta eraldaketa teknologikoko prozesu globalei egokitzea eta aurre hartzea eraginkortasunaren, lehiakortasunaren, berrikuntzaren eta jasangarritasunaren ikuspegitik sortuko diren aukera berriak aprobetxatuz.

Gipuzkoaren Aldundiaren ikuspegiak lehiakortasuna komunitatearen motor gisa barneratzen du. Horregatik, ekimena, erantzukizuna eta konpromiso indibidual eta kolektiboa bultzatzen ditugu eragin ekonomikoa eta soziala duten proiektuak garatzearren. Zentzu horretan, ezinbestekoa tresna da berrikuntza jarduera ekonomiko berriak, kalitatezko enpleguak eta hazkunde berdintasunezko aukerak sortzeko. Adimen Artifiziala (IA), Gauzen Interneta (IoT), industria automatizazioa, hodeiko konputazioa eta datuen analisia bezalako teknologiak aldaketa hori bultzatzen ari dira. Bereziki, IA generatiboa hainbat sektore iraultzen ari da, ChatGPT eta DALL-E bezalako tresnekin, enpresek edukiak sortzeko, produktuak garatzeko eta prozesuak optimizatzeko modua eraldatuz.

Industria-sektoreak aldaketa esanguratsuak izan ditu azken urteotan digitalizazioarekin eta 4.0 industriarekin lotutako teknologiak aplikatzearen ondorioz, eta eragin handia izan du eraginkortasun operatiboan, bezeroekiko harremanetan eta merkatuko sarbidean. Bilakaera horrek negozioak lantegi adimentsu, oso eraginkor eta balio-katearekin gero eta integratuago bihurtu ditu. Gainera, funtsean aldatzen ari da enpresek merkatu globalean jarduteko eta lehiatzeko duten modua; bezeroek orain eskatzen dituzte produktu pertsonalizatuak, ustekaberik gabeko esperientzia, etenik gabeko zerbitzuak eta tresna berritzaileek babestutakoak. Teknologia horiek prozesu industrialak optimizatzeaz gain, negozio-eredu berriak eta produktu berritzaileak sortzea sustatzen dute.

Eraldaketa digitala ezartzea ez da prozesu erraza, eta hainbat erronka gainditu behar dira. Alde batetik, erronka teknikoek azpiegituretan inbertsio esanguratsuak egitea ekar dezakete, betiere inbertsio-itzulkina (ROI) ebaluatuz, garatzea soluzio eskalagarriak eta merkatuaren behar aldakorretara egokitzeko modukoak, eta zibersegurtasuna bermatzea ziber-erasoen gorakadaren aurrean datuak eta sistemak babesteko. Bestalde, erronka kulturaletan funtsezkoa da aldaketarekiko erresistentzia kudeatzea, etengabeko trebakuntza sustatzea, erakundeek bezeroekin, sakonki aldatzea langileekin eta bazkideekin lan egiteko eta harremanak izateko modua eta berrikuntza-kultura sustatzea. Prozesu luzeak eta bestelako gabeziak gorabehera, sektorea eboluzionatzen ari da.

Testuinguru horretan, Berrikuntza Zuzendaritzak eraldaketa digitala behar estrategiko gisa planteatzen du, teknologikoki gero eta aurreratuagoa den enpresa-ingurunean lehiakortasunari eusteko. Teknologia disruptiboak sartzea eta informazioaren eta komunikazioaren teknologiak baliatzea enpresen ibilbide-orri estrategikoaren zati izan behar dira, batez ere ETEen ibilbide-orri estrategikoaren zati. Europar batasuneko «2024 State of the Digital Decade» txostenak 2030eko Hamarkada Digitalaren helburuak lortzera bideratutako Europako politiken betetze-maila ebaluatzen du, lau kategoriatan multzokatuta: azpiegitura digitala, negozioen eraldaketa digitala, trebetasun digitalak eta zerbitzu publiko digitalak. Enpresa txiki eta ertainei (ETEei) tresna digitalak hartzen laguntzeko beharra nabarmentzen da, bereziki hodeiko konponbideak erabiltzean, datuen analisian eta adimen artifizialean, lehiakorragoak izateko eta hazteko aukerak aprobetxatzeko.

Gipuzkoa Digitala programa Gipuzkoako enpresen eraldaketa digitala bultzatzeko ekimen estrategiko gisa sortu da, erakunde bakoitzaren heldutasun digitalera egokitutako laguntza eskainiz. Digitalizazioa prozesu uniformea ez dela jakinda, programak ikuspegi malgua diseinatzen du, enpresei beren bilakaera digitalaren etapa desberdinetan laguntzeko.

Programa bi laguntza-ildotan egituratzen da:

—Lehengoak 4.0 produktuen garapena du ardatz, eta produktu tradizionalak gailu adimendun eta konektatu bihurtuko dituzten teknologiak txertatzea du helburu. Helburua da enpresek sortu ahal izatea komunikatzeko eta egoerari, funtzionamenduari eta premiei buruzko informazioa emateko gai diren produktuak, horien kudeaketa aurreratua ahalbidetuz.

—Bigarren laguntza-lerroa zuzenduta dago beren enpresa-prozesuetan datuak sortzen dituzten baina erabat aprobetxatzen ez dituzten enpresei. Datuak biltze hutsetik informazio estrategiko bihurtzera jauzi kualitatiboa egiten laguntzen die programak, eta, horrela, enpresako arlo batzuk optimizatzen ditu, denbora errealeko informazio objektibotik abiatuta lehiakortasuna hobetzeko. Horren barruan sartzen dira datuak aztertzeko eta ustiatzeko adimen artifiziala eta adimen artifizial sortzailea, eraginkortasun operatiboa handitzeko, merkatu-joerak aurreikusteko, bezeroaren esperientzia hobetzeko, lehia-abantaila esanguratsuak eskaintzeko eta erabaki estrategikoak hartzea erraztuko duten ezagutzak emateko.

Dirulaguntza ildo horiek 2024-2027 Dirulaguntzen Plan Estrategikoan (DLPE) jasota daude.

2025eko deialdian, 2022ko martxoaren 22an Diputatuen Kontseiluak onetsitako oinarri orokor arautzaileak aplikatuko dira (2022ko apirilak 5eko 65 zk. Gipuzkoako Aldizkari Ofizialean).

Horiek horrela, Ekonomia Sustapeneko eta Proiektu Estrategikoetako Departamentuko foru diputatuak proposatuta, eztabaidatu ondoren, Diputatuen Kontseiluak

ERABAKITZEN DU

Lehenengo. Onestea, Gipuzkoa Digitala: 4.0 Produktu dirulaguntza lerroan dirulaguntzak emateko oinarri arautzaile espezifikoak (I. eranskinan jasotakoak).

Bigarren. Onestea dirulaguntzen 2025eko deialdia Gipuzkoa Digitala programaren 4.0 Produktu dirulaguntza lerroan, erabaki honen II. eranskinean jasota dagoena.

Hirugarren. 2025eko ekitaldiko deialdiari aurre egiteko 794.375,00 €ko gastua baimentzea, aurrekontu sail hauen kontura:

—Produktu 4.0.

1 0520.210.770.00.05 2025: 474.375 €.

5 0520.210.770.00.05 2026: 320.000 €.

Aurkeztutako eskaerak ebatzi aurretik, aldaketaren zenbatekoaren arabera eskumena duen organoak onartutako gastuaren zenbatekoa handitu ahal izango du, deialdi berri bat egin gabe. Kopuru gehigarria eraginkorra izateko baldintza izango da dirulaguntzak ematea ebatzi aurretik kreditua erabilgarri deklaratzea.

Laugarren. Erabaki honen bidez onartzen diren oinarri arautzaileek Gipuzkoako Aldizkari Ofizialean argitaratzen diren egunean sortuko dituzte ondorioak.

Erabaki hau behin betikoa da eta amaiera ematen dio administrazio bideari. Interesdunek erabaki honen aurka zuzenean administrazioarekiko auzi errekurtsoa aurkez dezakete Administrazioarekiko Auzietako Donostiako Epaitegietan, jakinarazpena jaso eta biharamunetik hasita bi hilabeteko epean.

Hala ere, partikularrek aukera dute horren aurretik berraztertzeko hautazko errekurtsoa aurkezteko Diputatuen Kontseiluari, jakinarazpena jaso eta biharamunetik hasita hilabeteko epean. Hori eginez gero, ezingo da administrazioarekiko auzi errekurtsorik aurkeztu harik eta berraztertzekoaren berariazko ebazpena eman edo ustezko ezespena gertatu arte. Dena dela, egoki iritzitako beste edozein errekurtso aurkez daiteke.

Donostia, 2025eko apirilaren 7a.—Idazkari teknikoa, ez dagoenez, Iñaki Egizurain Nebreda, Lege Aholkularitza eta Koordinazioko atalburua. (2798)

I. ERANSKINA

Dirulaguntza lerroaren oinarri bereziak: 4.0 produktua.

1. oinarria. Xedea.

4.0. industria, enpresa adimenduna, industriaren interneta edo konektatutako enpresa, hainbat modu daude etorkizun hurbilean enpresen lehiakortasunaren gakoen kontzeptua definitzeko.

Abiadura bizian aldatzen ari den mundu konektatu honetan, enpresek ulertu behar dute lehiakorrak izan nahi badute eszenatoki horretara egokitu behar dutela, eta, are gehiago, lider izan. Horregatik, enpresen ibilbide orri estrategikoan ezinbestean sartu behar dira teknologia disruptiboak eta, batez ere, informazioaren eta komunikazioaren teknologiak.

Lerro honek laguntzak sortu nahi ditu Gipuzkoako enpresentzat, arlo horietako batean prozesua bizkortzeko: «4.0 produktua», informazioa sortzeko, biltzeko edo denbora errealean aztertzeko gai dena, eta bezero diren enpresei edo erakundeari berari kudeaketa aurreratua, datu fidagarrietan oinarritua eta, horregatik, eraginkorragoa, ahalbidetuko diena, izan ere, enpresak gero eta akats gutxiago egin ditzake.

Laguntza lerro honek lagunduko ditu fabrikazio aurreratuaren eta 4.0 Industriaren merkatura zuzentzen diren produktu eta aplikazio berriak garatzera zuzendutako proiektuak, betiere, berrikuntza badute, hau da, produktu edo prozesu garapenak (edo bien konbinazioa) berriak edo hobetuak badira, edo nabarmen desberdinak, entitate eskatzaileak eskaintzen dituenen aldean.

Proiektuak garapen esperimentaleko kategorian sartuko dira, kontuan hartuta Europar Batzordearen ekainaren 17ko 651/2014 Erregelamendua (EB), laguntza kategoria batzuk merkatu batuarekin bateragarri direla deklaratzen duenak Itunaren 107. eta 108. artikuluak aplikatuta (EBAO L 187. zk. 2014/06/26).

«Garapen esperimentala» da zientziaren, teknologiaren edo enpresaren arloan, edo bestelakoetan, dagoeneko ezagunak diren jakintzak eta teknikak eskuratzea, konbinatzea, konfiguratzea eta erabiltzea, produktu, prozesu edo zerbitzu berriak, aldatuak edo hobetuak diseinatzera edo planak eta egiturak prestatzera zuzenduak badira. Adibidez, produktu, prozesu edo zerbitzu berrien kontzeptua, plangintza eta dokumentazioa zehazteko jarduerak sartu ahal izango dira proiektuetan. Garapen esperimentalak bere baitan har ditzake ondoko hauek: prototipoak sortzea, demostrazioa eta proiektu pilotuak egitea, produktu, prozesu edo zerbitzu berriak edo hobetuak probatu eta baliozkotzea funtzionamendu baldintza errealak ordezkatzen dituzten inguruneetan, betiere helburu nagusitzat badute hobekuntza teknikoak txertatzea behar bezala errotuta ez dauden produktu, prozesu edo zerbitzuetan. Era berean, bere baitan har dezake komertzialki erabil daitezkeen prototipo edo proiektu pilotuen garapena, baldin eta amaierako produktu komertziala badira eta horiek fabrikatzea garestiegia bada soilik demostrazio eta baliozkotze prozesuetan erabiltzeko. Garapen esperimentalak ez ditu bere baitan hartzen produktuetan, produkzio ildoetan, fabrikazio prozesuetan, lehendik existitzen diren zerbitzuetan eta aribidean dauden beste operazio batzuetan egiten diren ohiko edo aldizkako aldaketak, nahiz eta aldaketa horiek hobekuntzak ekarri.

Ez dira lagungarriak izango:

—Bezero partikularraren behar berezietara moldatutako produktuak edo zerbitzuak.

—Entitate eskatzailearen barneko prozesuen berrikuntzak.

—Proiektuen bigarren faseak edo produktuen edo zerbitzuen bertsio hobetuak, Gipuzkoako Foru Aldundiak jada sustatuta daudenak.

—Eremu teknologiko espezifikoekin erlazionatuta dauden proiektuak, Gipuzkoako Foru Aldundiaren beste programa batzuk sustatzen dituztelako. Salbuespenak deialdi bakoitzean zehaztuko dira.

2. oinarria. Entitate onuradunak.

2.1. Entitate onuraduntzat joko dira bere jarduera Gipuzkoan garatzen duten enpresak, betiere laguntzen den proiektuaren emaitza instalazio horietan zuzenean aplikatzen bada. Era berean, proiektua Gipuzkoako Lurralde Historikoko egoitzetan garatu behar da, hargatik eragotzi gabe proiektuaren zati bat lurraldetik kanpo azpikontratatu daitekeela.

2.2. Ezingo dira onuradun izan Europar Batasuneko Batzordeak dirulaguntza legez kontrakoa dela eta merkatu bateratuarekin bateraezina dela aldez aurretik erabaki ondoren, laguntzak berreskuratzeko agindupean dauden enpresak; ezta krisian dauden enpresak ere.

2.3. Dirulaguntza hauetara enpresak bakarka edo entitate talde batek bultzatutako proiektuak aurkeztu daitezke. Talde proiektuetan, entitate batek lidergoa hartuko du eta taldekideen lider bezala arituko da. Elkarlan proiektuen kasuan, proiektuan parte hartzen duen enpresa multzotik, Gipuzkoako enpresei dagokien parteak bakarrik jasoko du dirulaguntza.

3. oinarria. Proiektuaren baldintzak.

3.1. Diruz lagundu daitezke, besteak beste, ondoko alorrekin lotutako 4.0 produktuen edo 4.0 zerbitzuen garapena:

—Ekoizpen prozesuaren kudeaketa eta kontrola.

—Konektagarritasuna.

—Konputazioa eta lainoa.

—Errealitate handitua eta errealitate birtuala.

—Robotika aurreratua.

—Gauzen Interneta (IoT).

—Ikusmen artifiziala, 3D ikuskapena eta neurtze aurreratua.

—Fabrikazio gehigarria eta 3D inpresioa.

—Prozesuen eta produktuen trazabilitate teknologiak.

—Adimen artifiziala, ikaskuntza automatikoa (Machine Learning).

3.2. Ekainaren 17ko 651/2014 Erregelamenduko (EB) 6. artikuluaren arabera, oinarri hauetan arautzen diren dirulaguntzak emango dira soilik laguntza jasoko duen enpresaren jardueran pizgarri efektua sortzen badute:

* ETE baten kasuan, laguntzak pizgarri efektua duela ulertuko da onuradunak proiektuan edo jardueran lanean hasi aurretik aurkeztu badu laguntza eskaera.

* Enpresa handiei dagokienez, laguntza batek pizgarri efektua duela ulertuko da baldin eta aurreko apartatuan ezarritako baldintza betetzeaz gain, laguntzak emaitza hauetakoren bat edo gehiago izango dituela egiaztatzen badu:

—Laguntzari esker, proiektuaren edo jardueraren irismena nabarmen handituko da.

—Laguntzari esker, onuradunak proiektuan edo jardueran inbertituko duen zenbateko osoa nabarmen handituko da.

—Proiektuaren edo jardueraren exekuzio erritmoa nabarmen handituko da.

4. oinarria. Dirulaguntzaren xede diren jarduerak eta diruz lagundu daitezkeen gastuak.

4.1. Enpresa bakoitzak proiektu bakar bat aurkez dezake deialdi bakoitzeko. Proiektu bat baino gehiago aurkezten baditu, lehenik aurkeztutakoa bakarrik hartuko du kontuan prozeduraren organo izapidegileak.

4.2. Diruz lagundu daitezkeen gastuak, izango dira: ekainaren 17ko 651/2014 Erregelamenduko (EB) 25.3 artikuluan zehazten direnen artean, entitate eskatzaileak aurkezten duen jardueraren aurrekontu xehatu eta zehatzean jasota egon eta zalantzarik gabe horren garapenarekin lotuta dauden gastuak, bereziki barruko langileria gastuak eta azpikontratazioak.

* Langileria gastuen kasuan:

—Barruko langileak badira, enpresarentzako kostu erreala balioztatuko da. Barruko langileen gehieneko kostu hautagarria deialdi bakoitzean zehaztuko da. Ekonomia Sustapeneko eta Proiektu Estrategikoerako Departamentuak (aurrerantzean, departamentua) uste badu ordutegi deklarazioak gehiegizkoak direla, muga bat jarriko da, enpresaren langile kopuru osoaren arabera eta kasuan kasuko proiektu motaren arabera.

—Kanpoko langileen gehieneko kostu hautagarria deialdi bakoitzean zehaztuko da.

—Bidaia eta mantenu gastuak ez dira diruz lagunduko.

* Azpikontratazioen kasuan: ez da gastu hautagarria izango fakturako Balio Erantsiaren gaineko Zerga.

4.3. Onuradunari lotutako pertsonei edo entitateei dagozkien gastuak ez dira diruz lagunduko, salbu eta:

— Enpresari lotutako enpresako I+G unitatea bada, eta/edo

— Merkatuko baldintza arrunten arabera egiten bada; eta

— Aldez aurretik departamentuaren baimena eskuratu bada.

5. oinarria. Dirulaguntzen portzentajea eta gehieneko zenbatekoa.

5.1. Ekainaren 17ko 651/2014 Erregelamenduaren (EB) 25.5 artikuluaren arabera, laguntzaren intentsitatea ez da izango diruz lagundu daitekeen kostuaren %25 baino gehiagokoa.

5.2. Laguntzen intentsitatea handitu ahalko da, gehienez ere diruz lagundu daitezkeen gastuen %60ra arte, ondorengo eran:

a) %10, enpresa ertainen kasuan, eta %20 enpresa txiki eta mikroenpresen kasuan.

b) %15, baldintza hauetakoren bat betetzen bada:

I. Proiektuak berekin ekartzea lankidetza eraginkor bat:

—Enpresen artean, horietako bat, gutxienez, ETE bat izanik, edo lankidetza hori, gutxienez, Europar Batasuneko bi estatutan gauzaturik, edota estatu batean eta EEEko Akordioko alderdi kontratatzaile batean, eta ezein enpresaren kontura bakarrik ez izatea diruz laguntzekoak diren kostuen %70 baino gehiago, edo

—Enpresa baten eta ikerketako nahiz ezagutzaren zabalkundeko erakunde baten edo batzuen artean, azkeneko horiek bereganaturik diruz laguntzekoak diren kostuen %10, gutxienez, eta eskubidea izanik beren ikerlanaren emaitzak argitaratzeko.

II. Proiektuaren emaitzak hedatzea, hainbat bitarteko erabiliz, hala nola hitzaldiak, argitalpenak, irispide libreko oinarriak, eta programa informatiko doakoak edo iturri irekikoak.

5.3. Banakako proiektuen kasuan, gehieneko dirulaguntza 50.000 € izango da eta 60.000 € lankidetza proiektuetarako.

6. oinarria. Balorazio irizpideak.

6.1. Eskaerei 100 puntuko balorazioa emango zaie gehienez ere, ezarritako irizpide hauen arabera:

* Proposamenaren balioa eta bikaintasuna.

Gehienez 40 puntu. Atal hau baloratzeko, irizpide hauek hartuko dira kontuan:

—Deialdiaren helburuekin eta funtsezko teknologiekin bat etortzea (gehienez 10 puntu). Proiektua deialdiaren helburuetara zenbateraino egokitzen den, eta 3. oinarrian, 3.1 puntuan identifikatutako teknologia estrategikoekin duen lotura.

—Berrikuntza eta garapen-maila (gehienez 20 puntu). Proiektuaren berrikuntza-maila, honako hauek kontuan hartuta: 4.0 produktu edo zerbitzuen garapenean egiten den aurrerapen esanguratsua, proposatutako soluzioaren irismena, eta merkatuaren aukera edo jorratzen duen beharra.

—Bideragarritasun teknukoa (gehienez 10 puntu). Proiektuaren helburuak lortzeko proposatutako metodoen eta tekniken egokitasuna.

* Inplementazioaren kalitatea eta eraginkortasuna.

Gehienez 25 puntu. Atal hau baloratzeko, irizpide hauek hartuko dira kontuan:

—Proiektuaren argitasuna, zehaztasuna eta koherentzia (gehienez 5 puntu). Zehaztasuna proiektuaren deskribapenean, lan-planean, jarraipen-adierazleen sendotasunean eta arriskuen kudeaketan.

—Lantaldearen gaitasunak eta kudeaketa-egitura (gehienez 10 puntu). Lantaldearen esperientzia eta gaitasunak, kudeaketa-egituraren egokitzapena eta rolen banaketa. Kontuan hartuko da emakumeak taldean integratzea aniztasunaren eta ekitatearen funtsezko faktore gisa.

—Eraginkortasuna baliabideak erabiltzean (gehienez 10 puntu). Aurrekontuaren egokitzapena eta justifikazioa, baita proiektuaren bideragarritasuna bermatzeko finantza-baliabideen eta baliabide materialen esleipenaren eraginkortasuna ere.

* Erakundearen profila, trakzio-gaitasuna eta proiektuaren emaitzen eragina

Gehienez 35 puntu. Atal hau baloratzeko, irizpide hauek hartuko dira kontuan:

—Erakundearen profila eta trakzio-ahalmena (gehienez 10 puntu). Erakundeak proiektua aurrera eramateko duen gaitasuna, enpresaren tamaina, jarduera eta berrikuntzaren sustapenean egindako ibilbidearen arabera baloratua.

—Enpresa-estrategia inklusiboak: genero-berdintasuna eta euskara sustatzea (gehienez 10 puntu). Emakumeen eta gizonen arteko berdintasuna bultzatzen duten eta beren jardueran euskararen erabilera sustatzen duten neurriak eta ekintzak integratzea.

—Proiektuaren emaitzen eragina (gehienez 15 puntu). Proiektuaren potentziala enpresaren lehiakortasuna hobetzeko, balio erantsia, errentagarritasuna eta enplegua sortzeko, gizartean eragin positiboa sortzeko eta ingurumenaren iraunkortasunari laguntzeko.

6.2. Lankidetza-proiektuen kasuan, enpresa bakoitza bereizita baloratuko da, eta, ondoren, bere ahalegin ekonomikoaren arabera haztatuko da puntuazioa, eta puntuazio bera emango zaie bi enpresei, bi eskaerak batera tratatuz une horretatik aurrera. Era berean, enpresa bakoitzari emandako dirulaguntza kopururaren kalkulua egiteko, ahalegin ekonomiko horren arabera haztatuko da.

6.3. Ez zaie laguntzarik emango gehieneko puntuazioaren %50 baino gutxiago lortzen duten proiektuei.

7. oinarria. Araubide juridikoa.

7.1. Oinarri hauetan aurreikusitakoaz gain dirulaguntzak arautzeko kontuan hartuko dira martxoaren 27ko 3/2007 Foru Arauan, Gipuzkoako Lurralde Historikoko dirulaguntzei buruzkoan, apirilaren 29ko 24/2008 Foru Dekretuak onartutako araudian, eta dirulaguntzen alorreko gainerako araudi aplikagarrietan ezarritakoa.

7.2. Oinarri hauetan jasotzen diren dirulaguntzak Europar Batzordearen ekainaren 17ko 651/2014 Erregelamenduaren (EB) 25.2c) artikuluari lotuta daude. Erregelamendu horren bidez, zenbait laguntza kategoria barne merkatuaren bateragarritzat jotzen dira, Tratatuaren 107. eta 108. artikuluak aplikatuz (EBAO L 187. zk. 2014/06/26).

II. ERANSKINA

Gipuzkoa Digitala programaren 2025eko deialdia: 4.0 Produktua dirulaguntza lerroa.

1. Helburua.

2025erako deialdia, Gipuzkoa Digitala: 4.0 Produktua.

Diputatuen Kontseiluaren 2022ko martxoaren 22ko erabakiaren bidez (Gipuzkoako Aldizkari Ofiziala, 65 zk., 2022ko apirilaren 5ekoa) onartu ziren oinarri arautzaile orokorrak.

Dirulaguntza lerro honen oinarri arautzaile espezifikoak 2025eko apirilaren 1eko Diputatuen Kontseiluaren erabakiaz onetsitakoak dira, deialdi honekin batera Gipuzkoako Aldizkari Ofizialean argitaratzen direnak.

2. Finantzaketa.

2.1. Guztira deialdi honetako 4.0 Produktua dirulaguntza lerroan emango diren laguntzen zenbatekoa zazpiegun eta laurogeita hamalau mila hirureun eta hirurogeita hamabost eurokoa da (794.375), eta Gipuzkoako Lurralde Historikoaren Aurrekontu Orokorreko ondorengo kontu sailetan banatuta dago:

—Produktu 4.0.

1 0520.210.770.00.05 2025: 474.375 €.

5 0520.210.770.00.05 2026: 320.000 €.

2.2. Baimendutako gastuaren zenbatekoa handitu egin daiteke, aurkeztutako eskaerak ebatzi aurretik, aldaketaren zenbatekoaren arabera eskumena duen organoak, deialdi berri bat egin beharrik izan gabe. Gehikuntza hori benetan gertatzeko, ezinbestekoa da dirulaguntzak onartzen dituen ebazpena eman aurretik nahikoa kreditu dagoela deklaratzea.

3. Dirulaguntza eskatzeko baldintzak eta haiek frogatzeko era.

Laguntzak jaso ahal izango dituzte 2. oinarri arautzaile espezifikoan aipatzen diren erakundeak.

4. Eskaerak aurkezteko epea.

4.1. Eskaerak aurkezteko epea 40 egun naturalekoa izango da, deialdia Gipuzkoako Aldizkari Ofizialean aurkeztu eta hurrengo egunetik aurrera zenbatzen hasita. Eskaerak epearen azken eguneko 13:00ak arte aurkeztu ahal izango dira. Epearen azken eguna egun baliogabea bada (larunbata, igandea edo jaiegun izendatutakoak), hurrengo egun baliodunera luzatuko da epea.

4.2. Laguntzen pizgarri izaeraren baldintza bete behar denez, proiektuak ezingo dira hasi laguntza eskaera aurkeztu aurretik.

4.3. 651/2014 Erregelamenduko (EB) 6. artikuluaren arabera, oinarri hauetan arautzen diren dirulaguntzak emango dira soilik laguntza jasoko duen enpresaren jardueran pizgarri efektua sortzen badute:

* ETE baten kasuan, laguntzak pizgarri efektua duela ulertuko da onuradunak proiektuan edo jardueran lanean hasi aurretik aurkeztu badu laguntza eskaera.

—Laguntzari esker, proiektuaren edo jardueraren irismena nabarmen handituko da.

—Laguntzari esker, onuradunak proiektuan edo jardueran inbertituko duen zenbateko osoa nabarmen handituko da.

—Proiektuaren edo jardueraren exekuzio erritmoa nabarmen handituko da.

5. Dokumentazio elkarreragingarria eta egiaztagarria.

Deialdi honetan Gipuzkoako Foru Aldundiak honako betekizun hauek egiaztatuko ditu plataforma korporatiboen, bitartekaritza-plataformen (Nisae, Euskadiko administrazioen segurtasunerako eta elkarreragintasunerako nodoa) edo sarbide publikoko plataformen bidez:

— Gizarte Segurantzarekiko betebeharrak egunean izatea.

— Ogasunarekiko betebeharrak egunean izatea.

Pertsona edo erakunde eskatzaileak egiaztapen horren aurka egiten badu, berak aurkeztu beharko du dokumentazioa.

6. Eskaerarekin batera aurkeztu behar diren agiriak.

6.1. «Dirulaguntzen ataritik» sartuko da eskatzailea eskaerara. Eskaeran, eskatzailearen identifikazio datuez gain, erantzukizunpeko aitorpen bat ere jasoko da.

6.2. Eskaerarekin batera agiri hauek aurkeztuko dira:

6.2.1. Banakako proiektuak.

a) Erantzukizunpeko adierazpena eranskinean edo bide telematikoz egindako eskaeran dagoen ereduari jarraituz, ez dagoela Gipuzkoako Lurralde Historikoko dirulaguntzei buruzko martxoaren 27ko 3/2007 Foru Arauaren 12. artikuluan aurreikusten diren onuradun izateko eragozten duten egoeratan eta ez dagoela 1/2023 Legegintzako Dekretuaren, martxoaren 16koaren, Emakumeen eta Gizonen Berdintasunerako eta Emakumeen aurkako Indarkeria Matxistarik Gabe Bizitzeko Legearen testu bategina onartzen duenaren 23. artikuluaren 2. zenbakiak adierazitako debeku-kasuetako baten mende.

b) Proiektua baloratzeko galdetegia. Galdetegian proiektuari buruzko hainbat informazio eskatuko da ikuspegi teknikoaren aldetik eta merkatuaren ikuspegitik, eta baita ere enpresari buruzko informazioa, eta duela gutxiko eta aurreikusitako bilakaerari buruzko datuak, beharrezkoak baitira enpresa proiektuaren bultzada-gaitasuna ebaluatzeko.

c) Dirulaguntza eskatzen den proiektuko jardueren kronograma: jarduera bakoitzeko ezarritako datak eta dagozkion kostuak zehaztu beharko dira.

d) Aurrekontu xehatua formatu estandarrean.

e) Hala badagokio, kontratatu beharreko lanen eskaintzak.

f) Proiektuaren azalpen zabaldua, gehienez 10 orrikoa.

g) Edukiz gero, genero berdintasunaren eta euskararen arloko entitate eskumendunek igorritako ziurtagiriak, edo dagozkien planak eta planak ezarri izanaren frogak.

6.2.2. Lankidetzako proiektuak.

a) Lankidetzako proiektuen kasuan, 6.2.1 atalean aurreikusten den dokumentazioaz gain, beste guztien buru den entitateak aurkeztu beharko du proiektuan parte hartzen dutenen artean sinatutako lankidetza hitzarmenaren kopia, non zehaztuko diren, batetik, partaide bakoitzaren konpromiso ekonomikoak eta bere gain hartzen dituzten exekuzio konpromisoak eta, bestetik, partaideetako bakoitzak proiektuan duen egitekoa.

b) Lankidetzako proiektuetan parte hartzen duten gainontzeko entitateen kasuan, bakoitzak eskaera bat egin beharko du, eta horrekin batera 6.2.1 atalean aurreikusitako dokumentazioa aurkeztuko dute.

7. Mugak.

7.1. Bere lehenengo oinarrian xedatutakoaren arabera, ez da diruz laguntzeko modukotzat joko Gipuzkoako Foru Aldundiaren beste programa batzuen laguntza jasotzen duten eremu teknologikoekin lotutako produktuak edo zerbitzuak garatzea; zehazki, honako hauek:

—Zibersegurtasuna.

—Mugikortasun berria.

—Gastronomiaren balio katean teknologien aplikazioa.

7.2. Barneko langileen gastuek ez dute gaindituko horien benetako kostua, eta orduko 40 euroko gehieneko muga ezarriko da.

8. Eskaerei buruzko erabakia hartzea eta jakinaraztea.

Dirulaguntza emateko ala ukatzeko ebazpena eta horren jakinarazpena egiteko gehieneko epea 6 hilabetekoa izango da, deialdia argitaratu eta biharamunetik aurrera hasita.

Laguntzak eman edo, hala dagokionean, ukatzeko erabakia eskatzaile bakoitzari indibidualki jakinaraziko zaio. Hala eta guztiz ere, organo emaileak Gipuzkoako Aldizkari Ofizialean argitaratuko ditu emandako dirulaguntzak, Gipuzkoako Lurralde Historikoko dirulaguntzei buruzko 2007ko martxoaren 27ko 3/2007 Foru Arauak 17 artikuluan ezarritakoari jarraikiz.

9. Dirulaguntzak zuritu eta ordaintzea.

Onartutako dirulaguntza bi zatitan ordainduko da:

— Entitate onuradunek hilabeteko epea izango dute laguntzaren lehengo zatia ordaintzea eskatzeko, dirulaguntzari dagozkion jarduketak egiteko beharrezkoa den finantzazio gisa.

— Bigarren zatia ordaintzea eskatzeko, proiektua erabat burutu dutela zurituko dute 2026eko irailaren 11 baino lehen. Ordaintzeko eskaerarekin batera 14 oinarri orokorrean aurreikusitako zurigarriak aurkeztuko dira.

10. Zerga ondorioetarako kalikazio txostena.

Berrikuntzaren kenkariak aplikagarri zaizkien enpresei sarbidea errazteko (Gipuzkoako Lurralde Historikoko Sozietateen gaineko Zergari buruzko 2/2014 Foru Arauaren 63. artikulua), enpresak berariaz kontrakoa eskatzen ez badu behintzat, Berrikuntza Teknologikoko eta Internazionalizazioko Zerbitzuak kalifikazio-txosten bat emango die «Gipuzkoa Digitala - produktu 4.0» lerroko proiektu guztiei, baldin eta balorazioan 50 puntutik gorakoak badira.

11. Borondatezko itzulketa.

Enpresa onuradunak borondatezko itzulketa egin nahi badu, idatzi bat bidali behar dio Ekonomia Sustapeneko eta Proiektu Estrategikoetako foru diputatuari 16.4 oinarrian zehazten den moduan.