GIPUZKOAKO FORU ALDUNDIA

OGASUN ETA FINANTZA DEPARTAMENTUA

15/2025 Foru Agindua, urtarrilaren 13koa, ez-egoiliarren errentaren gaineko zerga aitortzeko erabili beharreko 210 eredua onartu, horiek aurkezteko prozedura eta baldintza orokorrak finkatu, eta ez-egoiliarren tributazioari buruzko arau jakin batzuk garatzen dituena. 

Ekainaren 1eko 270/2015 Foru Aginduak, besteak beste, ez-egoiliarren errentaren gaineko zerga aitortzeko 210 eredua onesten zuen. Han ezartzen ziren, orobat, hura aurkezteko baldintza orokorrak eta prozedura, eta, gainera, arau jakin batzuk garatzen zituen ez-egoiliarren tributazioari buruz. Bitan aldatu da foru agindu hura: zehazki, abenduaren 18ko 575/2022 eta abenduaren 23ko 596/2022 Foru Aginduen bidez.       
               

Hala ere, egindako aldaketa horiek ez dute jasotzen maiatzaren 17ko 11/2016 Foru Dekretuak onetsitako Ez-egoiliarren errentaren gaineko zergaren Erregelamendua onetsi izanak ekarritako aldaketa lehen aipaturiko 270/2015 Foru Aginduaren edukian.

Bestalde, maiatzaren 23ko 12/2002 Legearen bidez onetsitako Euskal Autonomia Erkidegoarekiko Ekonomia Itunak ezartzen duenez, ez-egoiliarren errentaren gaineko zerga itundutako tributu bat da, estatuak unean-unean ezarritako arau substantibo eta formal berberak dituena. Hori kontuan hartuta, eta egoitza Euskal Autonomia Erkidegoan duten establezimendu iraunkorrei aplikatu beharreko araudiaren kalte gabe, eta aintzakotzat harturik, era berean, azken urteotan establezimendu iraunkorrik gabeko ez-egoiliarren errenten aitorpenari loturik lurralde erkidean eginiko aldaketak, beharrezkoa da horiek guztiak Gipuzkoako Lurralde Historikoan aplikatzekoa den 210 ereduan txertatzea. Horrenbestez, eguneratu egin behar da 210 eredu hori.

Ildo horretan, ez-egoiliarren errentaren gaineko zergari buruzko abenduaren 10eko 16/2014 Foru Arauaren 28. artikuluaren 1. apartatuak ezartzen duenez, establezimendu iraunkorrik gabe errentak lortzen dituzten zergadunak behartuta egongo dira zergaren autolikidazioa aurkeztera, eta, horretarako, zerga horri dagokion tributu zorra zehaztu eta ordaindu beharko dute, Ogasun eta Finantza Departamentuko foru diputatuak finkatzen dituen modu, toki eta epeetan.

Aldiz, 28. artikulu horren 2. apartatuak zehazten du foru arauan bertan definitutako erantzule solidarioek ere autolikidazioa egin ahalko dutela, bai eta zorra ordaindu ere.

Bestalde, maiatzaren 17ko 11/2016 Foru Dekretuaren bidez onetsitako Ez-egoiliarren errentaren gaineko zergaren Erregelamenduak 7. artikuluaren 1. apartatuan ezartzen duenez, zergapetze bikoitza saihesteko hitzarmena Espainiarekin sinatua duen herrialderen bateko egoiliar den zergadun batek hitzarmenari heltzen badio, aipatutako hitzarmenean zergapetzeaz ezarritako muga edo bertan ezarritako salbuespenak aplikatuko ditu zuzenean autolikidazioan, zerga zorra zehazteko. Horretarako, egoitza ziurtagiri bat erantsi beharko dio autolikidazioari, dagokion zerga agintaritzak emana, edo, bestela, hitzarmenetako garapen aginduetan ezarritako formularioa.

Erregelamendu horrek ezartzen du, orobat, ez dutela autolikidaziorik aurkeztu beharko atxikipena edo konturako sarrera behar duten errentei loturik, betiere salbuetsita badaude zergari buruzko foru arauaren 14. artikuluan edo aplikatzekoa den zergapetze bikoitzeko hitzarmen batean aurreikusitakoaren arabera.

Azaldutakoa kontuan hartuta, egokitzat jotzen da 210 ereduaren erregulazioa eguneratzea, eta, horretarako, foru agindu bat onesten da, haren onarpena ez ezik aurkezteko baldintzak eta prozedura ere arautzeko, bai eta ez-egoiliarren tributazioari buruzko arau jakin batzuk garatzeko ere.

Horiek horrela, hau

XEDATZEN DUT

1. artikulua.    210 eredua onestea.

Onetsirik geratzen da 210 eredua, «Ez-egoiliarren errentaren gaineko zerga. Establezimendu iraunkorrik gabe lortutako errentak. Autolikidazioa» izenekoa, foru agindu honetan I. eranskin gisa jasotzen dena.

Hiru ale ditu ereduak: «Zergadunaren/ordezkariaren alea», «Erantzule solidarioaren/atxikitzailearen alea», eta «Administrazioaren alea».

2. artikulua.    210 ereduaren edukia.

1.    Edozein errenta mota autolikidatu daiteke eredu honetan (hala nola etekinak, ondasun higiezinen errenta egotziak, ondare irabaziak).

Errenta sortzapen bakoitza zein bere aldetik autolikidatzeko nahiz epe jakin batean lortutakoak elkartuta autolikidatzeko erabiliko da eredu hau, erregela hauei jarraituz:  
               

a)    Ondasun higiezinak eskualdatzeagatik lortutako errentak: errenta sortzapen bakoitza zein bere aldetik autolikidatuko da. Salbuespen gisa, eskualdatutako ondasun higiezinaren titulartasuna senar-emazte batena denean eta bi ezkontideak ez-egoiliarrak direnean, zilegi da autolikidazio bakarra egitea. Galerarik gertatu bada, autolikidazio hau ere aurkeztu beharko da egindako atxikipenaren itzulketarako eskubideaz baliatu nahi denean.       
               

b)    Gainerako errentak: zergadun berak hainbat errenta lortu baditu, posible da horiek elkartzea, baldin eta haien errenta motak kode bera badute, ordaintzaile berberarengandik badatoz, karga tasa bera aplikagarri bazaie, eta, gainera, ondasun eta eskubide batetik deribatuak izanik, ondasun edo eskubide beretik badatoz.

Hala ere, errentan edo azpierrentan hartutako higiezinen etekinak badira, atxikipenik ez dutenak, baldintza horiekin elkartu ahal izango dira, ordaintzaile beretik datozen errentei dagokiena izan ezik; ordaintzaile batengandik baino gehiagorengandik datozen higiezinen etekinak aitortzen direnean, alabaina, beharrezkoa izango da errenta motaren berariazko kode bat adieraztea, 35a, hain zuzen ere.

Elkartutako errentak ezin dira inoiz konpentsatu beren artean.

Autolikidazioen emaitza ordaintzekoa bada, hiruhilekoa izango da elkartu daitekeen epealdia; aldiz, autolikidazioen kuota zero bada edo itzultzeko emaitza badute, epealdi hori urtea izango da. Dena den, elkartze aldia urtekoa izango da higiezinen errentamendu edo azpierrentamendutik lorturiko errenten kasuan.

2.    Aitortutako errentak ondasun higiezinen errentamendutik edo azpierrentamendutik, hiri higiezinetatik egotzitako errentetatik edo ondasun higiezinen eskualdatzeetatik sortuak baldin badira, zergadunak berak agertu beharko du autolikidazioa egiten duen pertsona gisa.

3.    Autolikidazioa aurkezteko momentuan, zorra ordaindu behar da edo, bestela, egindako autolikidaziotik ondorioztatzen den itzulketa eskatuko da, dagokion kontabilitate agiria erabilita. Kontabilitate agiria bete beharko da, ordaindu edo itzuli beharreko emaitzarik ez dagoenean.          
               

3. artikulua.    Establezimendu iraunkorrik gabe Gipuzkoan lortutako errentengatik zergaren autolikidazioa aurkeztera behartuak.

1.    Ez-egoiliarren errentaren gaineko abenduaren 10eko 16/2014 Foru Arauak (aurrerantzean zergaren foru araua) 28. artikuluan xedatutakoaren arabera, eta Ez-egoiliarren errentaren gaineko zergaren Erregelamenduan (aurrerantzean erregelamendua), maiatzaren 17ko 11/2016 Foru Dekretuak onartzen duena, 7. artikuluan ezartzen duenez, ez-egoiliarren errentaren gaineko zergaren zergadunek lortutako errentak lortzen badituzte establezimendu iraunkorrik gabe, errenta horien autolikidazioa aurkeztu behar dute. 

2.    Aurreko 1. apartatuan xedatutakoa xedatuta ere, zerga honen zergadunak ez daude behartuta errenten autolikidazioa aurkeztera, errenta horiei dagoeneko foru-arauaren 31. artikuluan aipatzen den zergaren atxikipena edo konturako sarrera eginda, edo atxikipenari edo konturako sarrerari lotuta egon arren, zergaren foru-arauaren 14. artikuluan edo zergapetze bikoitzeko hitzarmen aplikagarrian xedatutakoaren arabera atxikipenari edo konturako sarrerari lotuta baina salbuetsita dauden errentei dagokienez.

3.    Zehazki, behartuta daude zergaren autolikidazioa aurkeztera:

a)    Zergari lotutako errentak lortzen dituzten zergadunak, baldin eta, zergaren erregelamenduko 14.3 artikuluan jasotakoaren arabera, atxikitzeko edo kontura sartzeko obligaziotik salbuetsita dauden errentak badira.

b)    Pertsona fisiko ez-egoiliarrak, zergaren foru arauko 24.5 artikuluan aipatutakoaren arabera ondasun higiezinei egotzitako errentagatik.

c)    Atxikipenak edo konturako sarrerak egitera beharturik ez dauden pertsonengandik etekinak jasotzen dituzten zergadunak.

d)    Gipuzkoan kokatutako ondasun higiezinen eskualdaketak direnean, zergadunek behin betiko zerga aitortu behar dute, eta, dagokion kasuan, diru sarrera egin, zergaren erregelamenduko 18.4 artikuluan ezarritakoari jarraituz. 
               

4.    Zergadunaren errentari egin zaion atxikipena edo konturako sarrera zergaren kuota baino handiagoa denean, zergaren erregelamenduak 20. artikuluan dioen moduan aurkeztuko da kuota horren gaineko soberakina itzultzeko eskaera.         
               

5.    Gipuzkoan establezimendu iraunkorrik gabe lortutako errenten autolikidazioa egitean, zorra kalkulatu behar da, eta bidezko diru-sarrera egin. Zergaren araudian aurreikusitako salbuespenetakoren bat aplikagarria bada, hura kontuan hartuta egingo da autolikidazioa.       
               

6.    Aitortutako errentak lortu dituztenak zergapetze bikoitza saihesteko hitzarmena Espainiarekin sinatua duten herrialdeetako zergadun egoiliarrak direnean eta hitzarmen horretara bilduta daudenean, hitzarmenean jasotako zergapetze mugak edo salbuespenak zuzenean aplikatuz kalkulatuko dute zorra beren autolikidazioan.

7.    Zergaren foru arauak 9. artikuluan aipatzen dituen erantzule solidarioek ere egin ahal izango dute autolikidazioa, eta kasuazorra ordaindu. Gainera, itzulketa eskatzen duten autolikidazioak izanez gero, atxikitzera behartutako subjektuek ere aurkeztu ahal izango dituzte.

4. artikulua.    210 eredua aurkezteko eta diru sarrera egiteko epea.

Honako hau izango da eredua aurkezteko eta, kasuak hala eskatzen badu, diru sarrera egiteko epea, aitortutako errenta motaren arabera:

a)    Zergaren erregelamenduak 18.4 artikuluan ezarritakoaren arabera, ondasun higiezinak eskualdatzeagatik lortutako errenten autolikidazioak, emaitza zeinahi dela ere, hiru hilabeteko epean aurkeztu behar dira, ondasun higiezinaren eskualdaketa egunetik hilabeteko epea igaro eta gero.             
               

b)    Gipuzkoan kokatutako ondasun higiezinen errenta egotziak, zergaren foru arauak 24.5 artikuluan aipatuak: eredua aurkezteko eta diru sarrera egiteko epea sortzapen dataren ondorengo urte naturala izango da.

c)    Gainerako errentak:

1.    Ordaintzeko emaitza duten autolikidazioak: apirileko, uztaileko eta urriko lehen 25 egun naturalek osaturiko aldia izango da aurkezteko eta ordaintzeko epea, eta sortzapen data azken hiruhileko naturalean duten errenten kasuan, berriz, hurrengo urteko urtarrila.

2.    Zero kuotako autolikidazioak: aitortutako errentak sortu eta hurrengo urteko urtarrilean aurkeztu beharko dira.   
               

3.    Itzultzeko emaitza duten autolikidazioak: aitortutako errentak sortu eta hurrengo urteko otsailaren 1etik aurrera aurkeztu ahal izango dira, lau urteko epean, atxikipena aitortzeko eta ordaintzeko epea bukatzen denetik zenbatzen hasita. Epe hori autolikidazio guztiei aplikatuko zaie, itzulketa barne arauaren edo zergapetze bikoitza saihesteko hitzarmen baten ondorio den gorabehera, eta aplikatzekoa izango da, orobat, hitzarmena garatzeko agindu batek epe laburragoa ezartzen duen kasuetan ere. Autolikidazioa aurkezteko epea aurkezten den egunean bertan amaituko da.          
               
               

5. artikulua.    210 ereduari erantsi beharreko dokumentazioa.

1.    Oro har, autolikidazioa egitean Espainiako barne araudian aurreikusten diren salbuespenak aplikatzen badira zergadunaren egoitza arrazoi hartuta, ereduari tokian tokiko agintari fiskalek luzatutako egoitza agiria erantsiko zaio eskubide horiek frogatzeko.

Hala ere, maiatzaren 17ko 11/2016 Foru Dekretuak onetsitako Ez-egoiliarren errentaren gaineko zergaren Erregelamenduaren hirugarren xedapen gehigarriaren 1. apartatuan aipatzen diren erakundeek zergaren foru arauaren 14.1.b) artikuluan aurreikusitako salbuespena aplikatzen dutenean, xedapen gehigarri horretan bertan xedatutakoaren arabera egiaztatu ahal izango da bizilekua.

Era berean, zergaren foru arauaren 14.1.m) eta 14.1.n) artikuluetan aurreikusitako salbuespenak aplikatzen direnean, ikuskapen edo erregistro administratiboko araubide espezifiko baten mende dauden pentsio funtsek edo inbertsio kolektiboko erakundeek salbuespenerako eskubidea justifikatzeko, bizileku ziurtagiria aurkeztu beharrean, hauetakoren bat baliatuko dute:

a)    14.1.m) artikuluko salbuespenaren kasuan, pentsio funtsaren ordezkariak egindako adierazpen bat erantsiko dute, zeinean adieraziko baita betetzen direla legezko baldintzak, foru agindu honen II. eranskineko ereduarekin bat etorriz.

Hala ere, enpleguko pentsio funtsen jarduerei eta gainbegiratzeari buruzko Europako Parlamentuaren eta Kontseiluaren 2016ko abenduaren 14ko 2016/2341 Zuzentarauak araututako gizarte aurreikuspeneko erakundea izanik, erantsi ahal izango dute erakundea kokatuta dagoen estatuko agintaritza eskudunak emandako ziurtagiri bat, Ez-egoiliarren errentaren gaineko zergaren Erregelamenduaren hirugarren xedapen gehigarriaren 2.a) apartatuko bigarren paragrafoan aurreikusitako baldintza berberetan eta balio mugagabe berberarekin.

b)    14.1.n) artikuluko salbuespenaren kasuan, erakundearen jatorrizko estatu kideko agintaritza eskudunak emandako ziurtagiria erantsiko dute, zeinean adieraziko baita erakunde horrek betetzen dituela Europako Parlamentuaren eta Kontseiluaren 2009ko uztailaren 13ko 2009/65/EE Zuzentarauan ezarritako baldintzak –zuzentarau horren bidez, balio higigarrietako inbertsio kolektiboko erakunde jakin batzuei buruzko lege, erregelamendu eta administrazio xedapenak koordinatzen dira–. Zuzentarau horren 97. artikuluan aurreikusitakoaren arabera izendatuko da agintari eskuduna.

Zergapetze bikoitza saihesteko Espainiak sinatutako hitzarmen baten ezarpen muga baten ondoriozko salbuespenak edo kuotaren murrizketa aplikatuz egiten denean autolikidazioa, eskubide horiek justifikatzen dituen zerga agintaritzak emandako egoitza fiskalaren ziurtagiria erantsiko da. Ziurtagiri horretan, berariaz adierazi beharko da zergaduna egoiliarra dela hitzarmenean definitutako zentzuan. Hala ere, autolikidazioa egitean kuota murrizketa aplikatzen bada, berariazko formulario baten erabilera ezartzen duen xedapen baten bidez garatutako hitzarmen batean finkatutako ezarpen muga bati jarraikiz, formulario hori aurkeztu beharko da ziurtagiria aurkeztu beharrean.   
               

Zergari buruzko foru arauaren 24.6 artikuluaren arabera, zerga oinarria zehazteko gastuak kentzen direnean Europar Batasuneko beste estatu kide batean bizi diren zergadunak izateagatik, beharrezkoa izango da dena delako estatuan egoitza fiskala izatearen ziurtagiria eranstea, estatu horretako agintaritza fiskalak emana.

Artikulu honetan aipatzen diren egoitza agiriek urtebeteko balioa izango dute ematen diren egunetik aurrera. Alabaina, zergaduna atzerriko estatu bat, haren azpibanaketa politiko edo administratiboetako bat, edo bertako toki entitateetako bat denean, egoitza agiriek balio mugagabea izango dute. Halaber, balio mugagabea izango du apartatu honetan bertan aipatutako b) letran jasotako inbertsio kolektiboko erakundearen jatorriko estatu kideko agintaritza eskudunak emandako ziurtagiriak, nola eta ez diren aldatzen han jasotako datuak.             
               
               

2.    Kuotatik atxikipenak edo konturako sarrerak kentzen direnean, behar diren frogagiriak aurkeztuko dira beti.        
               

Aitortutako errenta dibidenduak edo balore negoziagarrietatik eratorritako interesak badira, eta horiek Espainian eta atzerrian kokatutako finantza bitartekarien kate baten bidez ordaintzen badira, Zerga Administrazioak aukeran izango du atzerriko ordainketa katearen trazabilitatea egiaztatzea.   
               

Trazabilitatea egiaztatu ahal izango da, baldin eta, Ez-egoiliarren errentaren gaineko zergan establezimendu iraunkorrik gabe lortutako errenta jakin batzuen gaineko atxikipenen eta konturako diru sarreren urteko laburpenaren aitorpena egiteko 296 eredua eta hura aurkezteko moduak eta epeak onesten dituen urtarrilaren 13ko 2025/0013 Foru Aginduaren 3. eta 5. artikuluetan xedatutakoaren arabera, 296 ereduaren 2. erregistro motaren eranskinak aurkezten badira, hain zuzen ere, «Balore negoziagarriak. Zergadunei egindako ordainketen zerrenda» («A» orri eredua) eta «Balio negoziagarriak. Ordainketa ziurtagirien zerrenda» («B» orri eredua) izenekoak, eta haietan jasota badago 210 ereduarekin eginiko autolikidazioaren sarrera erregistroaren zenbakia, betiere balio negoziagarriari dagokion itzulketa eskaera, sortzapen data eta zergaduna zehazturik.

3.    Autolikidazioak aurkezten dituztenak baloreak gordailatzen dituzten erantzule solidarioak direnean, nahikoa izango da haiek preskripzio epeak dirauen bitartean gordetzea zerga Administrazioaren esku, aurreko 1. zenbakian aipaturiko egoitza agiriak, formularioak edo aitorpenak. 
               

Ez-egoiliarren errentaren gaineko zergan establezimendu iraunkorrik gabe lortutako errenta jakin batzuen gaineko atxikipenen eta konturako diru sarreren urteko laburpenaren aitorpena egiteko 296 eredua eta hura aurkezteko moduak eta epeak onesten dituen urtarrilaren 13ko 2025/0013 Foru Aginduaren 8. artikuluan xedatutakoaren arabera, beharrezkoa denean 296 ereduaren 2. erregistro motaren eranskinak aurkeztea –hain zuzen ere, «Balore negoziagarriak. Zergadunei egindako ordainketen zerrenda» («A» orri eredua) eta «Balio negoziagarriak. Ordainketa ziurtagirien zerrenda» («B» orri eredua) izenekoak–, erakunde zergapekoek foru agindu horren 5. artikuluan aurreikusitako epean aurkeztu beharko dituzte eranskin horiek, eta horietan 210 ereduko autolikidazioaren sarrera erregistroaren zenbakia adierazi beharko dute, betiere balio negoziagarriari dagokion itzulketa eskaera, sortzapen data eta zergaduna zehazturik. Hala, egiaztatutzat joko ahalko da atzerriko ordainketa katearen trazabilitatea.

4.    Autolikidazioek itzulketa eskaera dakartenean, kontuaren identitatea eta titulartasuna frogatuko dira. Horretaz gainera, itzulketa zergadunaren legezko ordezkariaren kontu batera egiteko eskatzen denean, ordezkaritzaren frogagiria erantsi behar da. Agiri horretan, klausula batek adierazi behar du legezko ordezkariak ahalmena duela itzulketa bere izenean eta zergadunaren kontura jasotzeko.
               

6. artikulua.    210 eredua aurkezteko moduak.

1.    Hauek dira 210 eredua aurkezteko moduak:    
               

a)    Internet bidezko transmisio elektronikoa, Zergabidea plataformatik, hurrengo apartatuetan aurreikusitako baldintza orokorrei jarraikiz.

Aurkezpen elektronikoa egiteko, betetzekoak izango dira Gipuzkoako Lurralde Historikoko zergen foru administrazioarekiko harremanetan bitarteko elektronikoak erabiltzeko obligazioa arautzen duen ekainaren 28ko 320/2017 Foru Aginduaren 2. eta 3. artikuluetan ezarritako baldintzak eta prozedura.

b)    210 eredua paperean aurkeztu ahal izango da, baldin eta, Gipuzkoako Lurralde Historikoko zergen foru Administrazioarekiko harremanetan bitarteko elektronikoak erabiltzeko obligazioa arautzen duen ekainaren 28ko 320/2017 Foru Aginduaren arabera, zergadunak ez badaude behartuta tributuekin loturiko izapideak eta komunikazioak bitarteko elektronikoen bidez egitera. Paper euskarriak foru agindu honen eranskinean ageri den formatua bete beharko du. Euskarri hori lortzeko, 210 eredua inprimatu ahal izango da, aldez aurretik Zergabidea plataformaren bidez bete ondoren.              
               

2.    Aurkeztutako autolikidazioaren ondoriozko itzulketak eta diru sarrerak ekainaren 28ko 320/2017 Foru Aginduaren 4. artikuluan xedatutakoaren arabera egin beharko dira.     
               

3.    210 ereduak itzultzeko emaitza badu, foru agindu honen 5. artikuluan xedatutakoari jarraituko zaio.      
               

4.    210 eredua paperean aurkezteko eta, ondoren, autolikidazioaren ordainketa egiteko, tributuak biltzeko laguntzaile gisa jarduteko baimena duen edozein erakundetara jo ahal izango da (bankuak, aurrezki kutxak edo kreditu kooperatibak), abuztuaren 2ko 38/2006 Foru Dekretuaren bidez onetsitako Gipuzkoako Lurralde Historikoko Zergabilketa Erregelamenduan aurreikusitako baldintzetan.

Hala ere, 210 ereduaren autolikidazioarekin batera dokumentazioren bat aurkeztu behar denean, hura gutun azal batean sartu eta entitate laguntzailean utziko da.

5.    Autolikidazioaren emaitza itzultzekoa bada –210 eredua– edo zero kuota ematen badu –210 eta 213 ereduak–, aurkezteko lekuak izango dira Ogasun eta Finantza Departamentuko Zuzeneko Zergen Zerbitzua, herritarren arretarako bulegoak, edo abuztuaren 2ko 38/2006 Foru Dekretuaren bidez onetsitako Gipuzkoako Zergabilketa Erregelamenduak zerga-bilketan laguntzeko baimentzen dituen entitateetako bat (banku, aurrezki-kutxa edo kreditu kooperatibak).    
               

7. artikulua.    Loteria eta apustu jakin batzuetako sarien gaineko karga bereziaren itzulketa eskaera, hitzarmen bat aplikatuta.

Establezimendu iraunkorrik gabeko zergadun ez-egoiliarrek loteria eta apustu jakin batzuetako sarien gaineko karga bereziari lotutako sariak eskuratu badituzte, eta karga berezi Hori dela eta Foru Ogasunean diru kopuruak sartu edo Foru Ogasunari ordaindu behar zaizkion atxikipenak jasan badituzte zergapetze bikoitza saihesteko hitzarmen baten aplikaziotik ateratzen dena baina zenbateko handiagoan, hitzarmenaren aplikazioa eta dagokion itzulketa eskatu ahal izango dute, 210 eredua erabilita. Autolikidazio horretarako ezarritako moduan, tokian, eta epeetan aurkeztuko dute eredua, beharrezkoa den dokumentazioa erantsita.

8. artikulua.    Itzulketa eskaera aitorpen eta egiaztapen prozedura berezi baten bidez egitea, jabetza intelektualeko eskubideen kudeaketa kolektiboko entitateen kasuan. 
               

1.    Jabetza intelektualeko eskubideen kudeaketa kolektiboa egiteko baimenduta dauden entitateek –Espainian egoitza dutenek– atxikipenak egin badituzte barruko araudian ezarritako karga tasaren arabera, eta ez-egoiliarren errentaren gaineko zergaren autolikidazioak 210 ereduaren bidez egitean itzulketa eskatzen badute zergapetze bikoitza saihesteko hitzarmen bat aplikatuta –likidazio horiek egin behar dira antzeko eskubideak kolektiboki kudeatzen dituzten beste entitate batzuei, beste herrialde batean egoiliartutakoei, zeinekin elkarrekiko zein alde bateko ordezkaritza kontratuak sinatuak baitituzte, ordainketak egiteagatik eta ordainketa horien likidazioetan ageri diren etekinengatik– aitorpen eta egiaztapen prozedura berezi bat erabili ahal izango da, baldintza hauek betetzen badira:        
               

a)    Jasotzaileek kudeaketa kolektiboko atzerriko entitatearen herrialde berean izan behar dute egoitza, hitzarmenaren zentzuan.  

b)    Jasotzaile bakoitzari dagozkion etekinek 10.000 eurotik beherakoak izan behar dute urte naturalean.

210 eredua itzulketa eskatuta betetzen denean, urte osoko etekinak jasoko dira. Bertan adierazi behar da jabetza intelektualeko eskubideen kudeaketa kolektiboan jarduteko baimenduta dauden entitate egoiliarretatik zeintzuk aurkezten duten autolikidazioa atxikitzaile gisa, eta zergadunari dagokion atalean kudeaketa kolektiboko entitate atzerritarra jarri behar da. Errenta motaren kodea adierazteko, prozedura berezi hau identifikatzen duen kodea idatziko da.

2.    Foru agindu honen 6.1 artikuluan dokumentazioari buruz xedatutakoa betetzearen ondorioetarako, apartatu horretan jasotakoaren ordez agiri hauek erantsi daitezke:    
               

a)    Kudeaketa kolektiboko atzerriko entitateak egindako ziurtagiria, hiru datu hauek jaso behar dituena: jasotzaileen zerrenda –haien egoitza, hitzarmenaren zentzuan, atzerriko entitatearen herrialde berean dagoela adierazita–, haietako bakoitzari dagokion zenbateko osoa, eta zenbateko horien batura.       
               

b)    Atzerriko entitatearen zerga egoitzaren ziurtagiria, herrialdeko agintari fiskalek egina. Ziurtagiria urtebeterako izango da balioduna, egiten den egunetik aurrera.

Sortzapenaren unean zergapetze bikoitza saihesteko hitzarmenak indarrean badaude, egiaztapen prozedura berezi honek ez du eragotziko hitzarmen horiek garatzen dituzten aginduetan xedatutakoa aplikatzea, baldin eta itzulketa prozeduran ezartzen bada berariazko formulario bat erabili behar dela edo zerga egoitzaren ziurtagiria aurkeztu beharra dagoela. Orobat, horrek ez du eragotziko zerga Administrazioak exijitu ahal izatea, kasuak hala eskatzen duenean, kudeaketa kolektiboko entitateek egindako ordainketa horietan sartutako etekinak jasotzen dituen edozein onuradunek hitzarmena aplikatzeko eskubidea justifikatu behar duela zerga egoitzaren ziurtagiria aurkeztuta. Ziurtagiriak egoitzaren herrialdeko agintari fiskalek egina behar du izan, eta adierazi behar du onuraduna hitzarmenaren zentzuan dela egoiliar.

9. artikulua.    Aitortzeko eta egiaztatzeko prozedura berezia, baloreetatik sorturiko harpidetza eskubideak eskualdatzetik eratorritako irabazi salbuetsien kasuan.

1.    Baloreetatik sorturiko harpidetza eskubideak eskualdatzetik eratorritako irabazi salbuetsiak izanez gero –salbuetsiak bai barne araudiaren bidez, bai hitzarmen bidez–, aitortzeko eta egiaztatzeko prozedura berezi bat erabili ahal izango da, arau hauei jarraikiz:

a)    Zero kuotako 210 ereduko autolikidazio berean bildu ahal izango dira jaulkitzaile beraren baloreetatik herrialde bereko egoiliarrek lortutako irabazi salbuetsiak.             
               

b)    Autolikidazioa egiten duen pertsona izan daiteke zergadun guztien ordezkari komuna, edo izan daiteke, orobat, baloreak gordailutzeko edo kudeatzeko agindua duen erakunde gordailuzaina edo kudeatzailea.

c)    Urte naturalean zergadun bakoitzari dagozkion irabazi salbuetsiak 500 eurotik beherakoak badira jaulkitzaile bakoitzeko.

2.    Agindu honen 7.1 artikuluan aurreikusitako dokumentazioari buruzko araudia betetzeko, apartatu horretan aipatutakoaren ordez, erantsi ahal izango da ordezkariak edo entitate gordailuzain edo kudeatzaileak emandako ziurtagiria, zergadunen zerrenda jasotzen duena, datu hauek adierazita: zergadunak zer herrialdetan bizi diren, zergadun bakoitzari dagozkion harpidetza eskubideak saldu ondotik lortutako zenbatekoa, eta zenbateko horien batura. Halaber, berariaz adierazi behar da badituela zerrendan sartutako zergadun bakoitzak egindako aitorpenak, alegatuz autolikidazioan adierazitako bizileku herrialdeko zerga egoiliarra dela.   
               

3.    Autolikidazioa egiten duen pertsona baloreen erakunde gordailuzaina edo kudeatzailea bada, ez da beharrezkoa izango dokumentazioa autolikidazioari eranstea, eta nahikoa izango da preskripzio aldian Zerga Administrazioaren eskura gordetzea.       
               

4.    Egiaztapen prozedura berezi hori gorabehera, zerga administrazioak ahalmena izango du, kasuak hala zehazten badu, aurreko 2. zenbakian aipatutako zerrendako edozein zergaduni salbuespena aplikatzeko eskubidea justifikatzea eskatzeko, eta, horretarako, bizileku duen herrialdeko zerga agintariek emandako zerga egoitzaren ziurtagiria aurkeztu beharko da.             
               

Lehen xedapen gehigarria.  Dibisetan egindako eragiketak.

Foru agindu honetan onartzen diren autolikidazioak betetzeari begira, euroa ez den moneta-unitatean egindako eragiketak eurora aldatuko dira sarrerak edo gastuak sortzen diren egunean indarrean dagoen eta Europako Banku Zentralak edo Espainiako Bankuak onartutako kanbio tasa ofiziala aplikatuz. Horretarako, euroaren sarrera arautzen duen abenduaren 17ko 46/1998 Legeak 36. artikuluan ezarritakoari jarraituko zaio. Data horretan kanbio-tasa ez bada ofizialki argitaratu, argitaratuta dagoen azken kanbio-tasa ofiziala hartuko da.         
                              
               

Kanbio tasa ofizialik ez badago, moneta unitatearen merkatuko balioa izango da erreferentzia.

Bigarren xedapen gehigarria.  Ez-egoiliarren errentaren gaineko zergaren Erregelamenduaren hirugarren xedapen gehigarria garatzea. Erakundeen ordezkariaren aitorpenak.             
               

Ez-egoiliarren errentaren gaineko zergari buruzko abenduaren 10eko 16/2014 Foru Arauaren 14.1 artikuluaren b) letran aurreikusitako salbuespena aplikatzeko, aitorpen eredu hauek onartzen dira maiatzaren 17ko 11/2016 Foru Dekretuaren bidez onetsitako Ez-egoiliarren errentaren gaineko zergari buruzko Erregelamenduaren hirugarren xedapen gehigarriaren 1. apartatuan aipatutako erakundeentzat, atxikipen-prozedurei zein zergaren aitorpenari dagokienez: 
               

1.    Onetsi egiten da pentsio funtsaren ordezkariaren aitorpen eredua, Ez-egoiliarren errentaren gaineko zergaren Erregelamenduko hirugarren xedapen gehigarriko 2.a) apartatuko lehen paragrafoan aipatzen diren legezko baldintzak betetzen direla adierazteko, eta, hala, egokitu egiten da foru agindu honen II. eranskinean agertzen den eredura.

2.    Onetsi egiten da Ez-egoiliarren errentaren gaineko zergaren Erregelamenduko hirugarren xedapen gehigarriaren 2.c).2. apartatuan aipatzen den inbertsio kolektiboko erakundearen edo haren erakunde kudeatzailearen ordezkariaren aitorpen eredua, eta, hala, egokitu egiten da foru agindu honen III. eranskinean agertzen den eredura.

3.    Onetsi egiten da inbertsio kolektiboko erakundearen edo haren erakunde kudeatzailearen ordezkariaren aitorpen eredua, errentak eratxikitzeko araubidearen peko erakunde bat dela egiaztatzeko, bai eta salbuespena jasotzeko eskubidea duten kideen partaidetza ehunekoa zehazteko ere, Ez-egoiliarren errentaren gaineko zergaren Erregelamenduko hirugarren xedapen gehigarriaren 3. apartatuan aipatzen den bezala. Hala, egokitu egiten da foru agindu honen IV. eranskinean agertzen den eredura.

Xedapen indargabetzaile bakarra.

Foru agindu hau behin indarrean jarri ondoren, indarrik gabe geratzen da urtarrilaren 14ko 29/2011 Foru Agindua, ez-egoiliarren errentaren gaineko zerga aitortzeko erabili beharreko 210, 211, eta 213 ereduak onartu, horiek aurkezteko prozedura eta baldintza orokorrak finkatu eta ez-egoiliarren tributazioari buruzko zenbait arau ematen dituena.    
               

Amaierako xedapen bakarra.

Foru agindu hau Gipuzkoako Aldizkari Ofizialean argitaratzen den egunaren biharamunean jarriko da indarrean.

Donostia, 2025eko urtarrilaren 13a.—Itziar Agirre Berriotxoa, Ogasun eta Finantza Departamentuko foru diputatua.   
                (276)

I. eranskina

1. ERANSKINA          

DIBISA GAKOAK

Dibisa                                                                               Gakoa

208                                   KOROA DANIARRA

578                            KOROA NORVEGIARRA

752                                 KOROA SUEDIARRA

036                            DOLAR AUSTRALIARRA

124                                DOLAR KANADARRA

554               DOLAR ZEELANDA BERRITARRA

840                                     AEBko DOLARRA

756                                FRANKO SUITZARRA

826                                    LIBRA ESTERLINA

954                                                    EUROA

392                                    YEN JAPONIARRA

999                          BESTE MONETA BATZUK

2. ERANSKINA          

ERRENTA MOTAK

01: Ondasun higiezin alokatuen edo berralokatuen etekinak.

35: Errentan hartutako edo azpierrentan emandako higiezinen etekinak, atxikipenari lotuta ez daudenak, zenbait ordaintzailerengandik lortutakoak multzokatzen direnean.

02: Ondasun higiezin hiritarren errenta egotziak.

03: Jarduera enpresarialen errentak.

—Entitateen funts propioetan parte hartzeagatik lortutako dibidenduak eta bestelako etekinak.

04: Entitateen funts propioetan parte hartzeagatik lortutako dibidenduak eta bestelako etekinak, salbu 29 eta 30 errenta mota gisa adierazitako kasuak.

29: Dibidenduak eta mozkinetako partaidetzak, Pentsio Plan eta Funtsen Legearen Testu Bateratuan araututako pentsio funts baliokideek lortu dituztenak (azaroaren 29ko 1/2002 Errege Dekretu Legegilea) eta zergaren foru arauak 14.1.m) artikuluan jasotakoaren arabera salbuetsita daudenak.

30: Dibidenduak eta mozkinetako partaidetzak, Europako Parlamentuaren eta Kontseiluaren 2009ko uztailaren 13ko 2009/65/EE Zuzentarauak jasotako inbertsio kolektiboko erakundeek lortu dituztenak eta zergaren foru arauko 14.1.n) artikuluan jasotakoaren arabera salbuetsita daudenak.

—Kapital propioen lagapenetik eratorritako interesak eta beste etekin batzuk.

05: Interesak eta beste etekin batzuk.

06: Salbuetsiak.

07: Hobarituak.

37: EEEZaren Erregelamenduaren hirugarren xedapen gehigarriak xedatutako prozedura erabili duten pentsio-funtsek edo inbertsio kolektiboko erakundeek lortutako ondasun higigarrien ziozko ondare-irabaziak, EEEZaren Foru Arauaren 14.1.b) artikulua aplikatuz salbuetsitakoak.

—Kanonak.

08: Jabetza industriala.

09: Jabetza intelektuala.

32: Itzulketa eskaera, jabetza intelektualeko eskubideen kudeaketa kolektiborako entitateetarako prozedura bereziaren bidez.

10: Ondasun higiezinen, negozioen edo meatzeen errentamenduak.

11: Know-know-a eta teknologia transferentziak.

12: Beste batzuk.

13: Laguntza teknikoa.

14: Jarduera artistikoen errentak.

15: Kirol jardueren errentak.

16: Jarduera profesionalen errentak.

17: Lan errentak.

18: Pentsioak eta hartzeko pasiboak.

19: Berraseguruak.

20: Itsas edo aire nabigazioko entitateak.

21: Kudeaketari laguntzeko zerbitzuak.

22: Beste errenta batzuk.

—Ondare irabaziak.

24: Kotizaziora onartutako akzioenak.

25: Inbertsio kolektiboko erakundeenak (funtsak).

28: Ondasun higiezinen eskualdaketenak, salbu 33 eta 34 motako errenta.

33: Ohiko etxebizitza izandakoaren eskualdaketarenak (EBko zergadunak edo informazio truke efektiboa duen Europako Esparru Ekonomikoko zergadunak egina), etxebizitza hori ohiko beste etxebizitza batean berrinbertitzeagatik salbuetsita egonik, berrinbertsioa eskualdaketaren aurretik egiten denean.

34: Ohiko etxebizitza izandakoaren eskualdaketarenak (EB edo informazio truke efektiboa duen EEEko zergadunak egina), etxebizitza hori ohiko beste etxebizitza batean berrinbertitzeagatik salbuetsita egonik, berrinbertsioa eskualdaketaren ondoren egiten denean.

31: Karga bereziari lotutako loteria eta apustu jakin batzuen gaineko sarienak (Ez-egoiliarren Errentaren gaineko Zergaren Foru Arauko seigarren xedapen gehigarria); hitzarmena aplikatuta egiten den itzulketa eskaera.

36: Harpidetza-eskubideen eskualdaketak, zeinen irabazi salbuetsia abenduaren 17ko EHA/3316/2010 Aginduaren 18. artikuluan aurreikusitako prozedura bereziaren bidez deklaratzen dena.

38: EEEZaren Erregelamenduaren hirugarren xedapen gehigarriak xedatutako prozedura erabili duten pentsio-funtsek edo inbertrsio kolektiboko erakundeek lortutako ondasun higigarrien ziozko ondare-irabaziak, EEEZaren Foru Arauaren 14.1.b) artikulua aplikatuz salbuetsitakoak.

26: Beste irabazi batzuk.

27: Zergapetze osagarria.

3. ERANSKINA          

ZERGA-TASAK

—Oro har.

—Pentsioak eta antzeko gainerako prestazioak.

—Kapital propioak hirugarrenei lagatzeagatik lortutako interesak eta bestelako etekinak: %19.

—Entitate baten funts propioetan parte hartzeagatik lortutako dibidenduak eta bestelako etekinak: %19.

—Inbertsio kolektiboko erakundeen kapitala edo ondarea ordezkatzen duten akzioak edo partaidetzak eskualdatzetik edo itzultzetik eratorritako errentak: %19.

—Aurreko puntuan aipatutakoez bestelako ondare-irabaziak, ondare-elementuak eskualdatzean agerian geratzen direnak: %19.

—Lan etekinak lurralde espainiarraren egoitzarik ez duten pertsona fisikoek jasotzen badituzte, sasoiko langile atzerritarrentzat eratutako iraupen jakineko kontratuen ondorioz eta lan araudiak ezarritakoaren arabera: %2.

—2. artikuluan aipatutako pertsona fisiko ez-egoiliarren lan etekinak, baldin eta pertsona fisikoen errentaren gaineko zergaren zergadun ez badira eta Espainiako misio diplomatikoetan eta kontsul ordezkaritzetan lan egiten badute, Espainiak bere egiten dituen nazioarteko itunetatik eratorritako berariazko arauen aplikazioa ezinezkoa denean: %8.

—Berraseguru eragiketetatik eratorritako etekinak direnean: %1,5.

—Atzerrian egoitza duten itsas edo aire nabigazioko entitateak direnean, baldin eta beren itsasontzi edo aireontziak Gipuzkoako lurraldean sartzen badira: %4.

—Ezarpen osagarria (IRNR FAren 19.2 artikulua): %19.