GIPUZKOAKO FORU ALDUNDIA

INGURUMENEKO ETA OBRA HIDRAULIKOETAKO DEPARTAMENTUA

Oinarri arautzaileak, «Enpresen erronka klima-aldaketaren aurkako borrokan, ekonomia zirkularra sustatuz» izeneko programaren sariak emateko.        

Diputatuen Kontseiluak, 2022ko otsailaren 8ko bileran, ondoko erabakia hartu zuen:

«Ingurumen Zuzendaritza Nagusiak bere helburuen artean du ekonomia zirkularra sustatzea, lurraldeko enpresa eta gizarte ehunarekin lankidetzan. Horrela dago ezarrita, bai Gipuzkoako Klima Aldaketaren Aurkako Borroka Estrategia 2050 izenekoan (GKAABE-2050) (6.3. jarduera ildoa), bai Gipuzkoako Hiri Hondakinak Kudeatzeko 2019-2030 Plan Orokorrean (BIR-5, BIR-6 eta BAL-1 ekintzak). Ekintza horietan ezarrita dago, aldi berean, Zuzendaritza Nagusiak bere jarduera gauzatzeko hauen laguntza izango duela: alde batetik, Gipuzkoako Aldaketa Klimatikoaren Fundazioa/Fundación de Cambio Climático de Gipuzkoa erakundearen laguntza, eta, bestetik, GK Recycling klusterraren laguntza. Azken erakunde hori berrerabilpenaren eta birziklapenaren arloko erakunde laguntzailea da, eta bertan daude ordezkatuta 51 eragile, horien artean enpresak, elkarteak, fundazioak, unibertsitate eta teknologia-zentroak eta ingurumen aholkularitzak eta ingeniaritzak. Gainera, eragile horietako batzuk erreferentziazkoak dira sektorean, eta jardunbide egokien adibide dira praktika zirkularraren aplikazioei eta berrikuntzari dagokienez.

Diputatuen Kontseiluak 2019ko azaroaren 12ko bilkuran onartu zuen Gipuzkoako Foru Aldundiaren 2020-2023 Plan Estrategikoa. Bertan, 48. helburu estrategiko gisa hau dago ezarrita: «Gipuzkoarako ekonomia % 100 zirkularra sustatzea 2050erako». 51 helburuak, berriz, honako hau dio: «Klima Aldaketaren aurkako Borroka Estrategia 2050 sustatzea (Gipuzkoa Klima, Naturklima)».

Gipuzkoako Aldaketa Klimatikoaren Fundazioa/Fundación de Cambio Climático de Gipuzkoa foru fundazio publikoa da, eta haren xedea da Ingurumen Zuzendaritza Nagusiari laguntza ematea GKAABE-2050 estrategia garatzeko orduan. Horretarako, klima aldaketa behatuko dute eta jarraipena egingo diote Gipuzkoan, eta ekonomia zirkularra eta energia trantsizioa oinarri duten programak sustatuko dituzte. Modu horretan, klima aldaketaren eraginei aurre egiteko erakundeen gaitasuna eta gaitasun teknikoa eta soziala bideratuko dute, eta trantsizio ekologikoa modu eraginkorrean gertatzeko beharrezkoa den eko-berrikuntza sustatu eta bizkortuko dute.

Trantsizio sozio-ekologiko horretan, ekonomia zirkularrean oinarritzen diren proiektuak sustatu eta bizkortu nahi dira enpresetan eta industrian. Proiektu horiei esker, enpresa horiek lehengaien kontsumoa murriztu ahal izango dute (eta, ondorioz, lurraldeko enpresen ingurumen eragina eta klima eragina murriztu egingo da eta lehiakortasuna igo), eta, horrez gain, enpresa horien barneko eta kanpoko berrikuntza eta ekintzailetza gehiago sustatuko da. Ekonomia Zirkularra Euskadiko Industrian Diagnosi Txostenak (Ihobe, 2018) aditzera ematen duen bezala, Euskadiko industria arloan jardunbide zirkular egokiak ezartzearen ondorioz lehengaiak % 6 aurrez daitezkeela kalkulatzen da, eta horrek 2.000 milioi euroko kopurua esan nahi du dirutan. Kontuan izaten badugu baliabideak erauztea eta kontsumitzea eta ondoren horiek hondakin gisa botatzea dela klima aldaketaren eta sistema naturalen gorabeheren erantzule garrantzitsuenetako bat, eragin horien aurka egiteko gakoa da ekonomia zirkularreko jarduerak eta proiektuak sustatzea enpresa eta industria sektorean.               

Horregatik guztiagatik, eta ekonomia zirkularraren arloan etorkizunean tokiko eko-merkatuan eragina izango duten zerbitzuak eta produktuak pentsatzera eta bultzatzera bideratutako enpresa-interesa pizteko eta erakartzeko, Ingurumen Zuzendaritza Nagusiak eta Gipuzkoako Aldaketa Klimatikoaren Fundazioa/Fundación de Cambio Climático de Gipuzkoa erakundeak «Enpresen Erronka Klima-Aldaketaren Aurkako Borrokan, Ekonomia Zirkularra Sustatuz» sarien 1 eta 2. edizioa deitu zuten 2020 eta 2021ean (56 eta 104 Gipuzkoako Aldizkari Ofiziala, 2020an, eta 74 eta 84 Gipuzkoako Aldizkari Ofiziala, 2021ean). Deialdi horien ostean, 2022an «Enpresen Erronka Klima-Aldaketaren Aurkako Borrokan, Ekonomia Zirkularra Sustatuz» sarien 3. edizioa proposatzen da. Abiapuntutzat 2021eko oinarri arautzaileen dokumentua hartuta, baina aurreko edizioan identifikatutako hobekuntza bat txertatuz, hau da, proiektuak ebaluatzeko irizpideak guztira 4 bloketan multzokatzea eta, horrekin batera, puntuak banatzea.     

Erabaki proposamenean jasotako dirulaguntzek ez dute estatu laguntza izaera Europar Batasuneko Funtzionamendu Itunean 107 artikuluko 1 apartatuan xedatutako moduan.               

Azaroaren 17ko 38/2003 Dirulaguntzen Lege Orokorraren 16. xedapen gehigarriak ezartzen duenaren arabera, Diputatuen Kontseiluaren eskumena da sari hauek emateko oinarri arautzaileak onartzea, halaber, emakida aurretiaz baimentzea, itzulketa eskatzetik eta zehapenak ezartzetik eratorritako eginkizunak, kontrol-eginkizunak eta administrazio-ahalak baliatzea dakarten gainerako eginkizunak.               

Ondorioz, azaldutako guztiagatik, Ingurumeneko eta Obra Hidraulikoetako Departamentuko foru diputatuak proposatuta, eta gaiaz hitz egin ondoren, Diputatuen Kontseilu honek

ERABAKITZEN DU

Lehenengo.    Gipuzkoako Aldaketa Klimatikoaren Fundazioa/Fundación de Cambio Climático de Gipuzkoa erakundea baimentzea sari hauek emateko: «Enpresen erronka klima-aldaketaren aurkako borrokan, ekonomia zirkularra sustatuz» programako sarien 3. edizioa.

Bigarren.    Oinarri arautzaileak onartzea Gipuzkoako Aldaketa Klimatikoaren Fundazioa/Fundación de Cambio Climático de Gipuzkoa erakundeak emango dituen «Enpresen erronka klima-aldaketaren aurkako borrokan, ekonomia zirkularra sustatuz» izeneko programaren sariak emateko. Oinarri horiek erabaki honekin batera doaz eranskin gisa.

Hirugarren.    Ahalmena ematea Gipuzkoako Foru Aldundiko Ingurumeneko eta Obra Hidraulikoetako Departamentuko foru diputatuari, emakida aurretiaz baimentzeko, itzulketa eskatzetik eta zehapenak ezartzetik eratorritako eginkizunak burutzeko, eta baita kontrol-eginkizunak eta administrazio-ahalak baliatzea dakarten gainerako eginkizunak ere.        

Erabaki hau behin betikoa da eta administrazio bidea amaitzen du. Nahi izanez gero, administrazioarekiko auzi errekurtsoa aurkez dezakete interesdunek Donostian dauden Administrazioarekiko Auzietako Epaitegietan, bi hilabeteko epean, erabaki hau argitaratu eta hurrengo egunetik aurrera.              

Hala ere, aukera dute horren aurretik berraztertzeko hautazko errekurtsoa aurkezteko Diputatuen Kontseiluaren aurrean, hilabeteko epean, erabakia argitaratu eta hurrengo egunetik aurrera. Hori eginez gero, ezingo da administrazioarekiko auzi errekurtsorik aurkeztu harik eta berraztertzekoaren berariazko ebazpena eman edo ustezko ezespena gertatu arte. Hori horrela izanik, egoki iritzitako beste edozein errekurtso ere aurkez daiteke.»

Hau guztia denen jakinaren gainean jartzen da.

Donostia, 2022ko otsailaren 9a.—Alberto Arana Rod, idazkari teknikoa.         (823)

ERANSKINA

Oinarri arautzaileak, «Enpresen erronka klima-aldaketaren aurkako borrokan, ekonomia zirkularra sustatuz» izeneko programaren sariak emateko lehiaketa publikoa arautzeko.

1.    Xedea.

Oinarri hauen xedea da «Enpresen erronka klima-aldaketaren aurkako borrokan, ekonomia zirkularra sustatuz» izeneko programaren sariak emateko baldintzak arautzea.             

2.    Parte-hartzaileak eta baldintzak.

Deialdia hauei zuzenduta dago:

— Proiektua Gipuzkoako Lurralde Historikoan garatzen duten pertsona fisikoak edo pertsona fisikoen taldeak, ekonomia zirkularraren sektorean negozio berritzailearen ideia dutenak eta beren negozio ideia baliozkotzeko eta hari ekiteko interesa dutenak.

— Ekonomia zirkularraren sektorean lan egiten duten Gipuzkoako Lurralde Historikoko ETEak, hau da, berreskuratze, birziklapen eta berrerabilpenaren arloan lan egiten dutenak.

— Aurreko taldean ez dauden Gipuzkoako Lurralde Historikoko ETEak, beren erronkak edo arazoak konpondu nahi dituztenak ekonomia zirkularrean oinarrituriko neurrien edo soluzioen bidez.

ETEen definizioa Europako Batzordearen 651/2014 Erregelamenduaren (EB) I. eranskinean jasota dago.

Erakunde horiek ezingo dute egon Gipuzkoako Lurralde Historikoko dirulaguntzei buruzko martxoaren 27ko 3/2007 Foru Arauaren 12. artikuluan onuradun izateko aurreikusitako debekuetako batean ere.   

3.    Proposamenak aurkeztea.

1.    Eskaerak aurkezteko epea izango da aurtengo deialdian ezartzen dena. Epea kontatzen hasiko da deialdia Gipuzkoako Aldizkari Ofizialean argitaratzen denetik.

Eskaerak internet bidez aurkezteko, Gipuzkoako Foru Aldundiaren egoitza elektronikoaren bidez egingo da (https://egoitza.
gipuzkoa.eus), eta horretarako bereziki gaituriko inprimakia bete beharko da.

2.    Nortasunik gabeko pertsona fisikoen taldeen kasuan, eskabidean eta dirulaguntza emateko ebazpenean berariaz jaso beharko dira elkarteko kide bakoitzak proiektua gauzatzeko hartutako konpromisoak, bai eta bakoitzari aplikatu beharreko sariaren zenbatekoa ere, hori ere pertsona onuraduntzat hartuko baita. Nolanahi ere, taldearen ordezkari edo ahaldun bakar bat izendatu beharko da, nahikoa ahal duena taldeari onuradun gisa dagozkion betebeharrak betetzeko. Taldea ezingo da desegin harik eta martxoaren 27ko 3/2007 Foru Arauaren 37. eta 54. artikuluetan aurreikusitako preskripzio epea igaro arte.      

3.    Eskaera bakarra aurkeztuko da, eta eskaera horrekin batera aurkeztu behar da deialdian ezartzen den dokumentazioa. Dokumentazio hori sartuko da aplikazio informatikoan, erantsitako dokumentu gisa.

4.    Sariak.

3 Proposamenik sendoenak hauek jasoko dituzte:

— Zuzeneko saria eskudirutan, 15.000 eurokoa.

— Hornituriko informatikako gunea eta tokia Gipuzkoako Aldaketa Klimatikoaren Fundazioa/Fundación de Cambio Climático de Gipuzkoa erakundeko ekonomia zirkularraren hub-ean, fundazioan eskuragarri dauden zerbitzuetarako sarbidearekin batera: erreprografia, komunikazioak, internet, etab., proiektua gauzatzeko.

Zuzkidurari atxikipen ekonomikoa egingo zaio, Gipuzkoako Lurralde Historikoan indarrean dagoen araudiak ezartzen duenaren arabera.

Sariaren helburua izango da enpresak proiektua edo proposamena ezartzea bere instalazioetan. Gainera, hornituriko laneko gune bat izango du (informatikako gune bat), Gipuzkoako Aldaketa Klimatikoaren Fundazioa/Fundación Cambio Climático de Gipuzkoa fundazioko egoitzan bertan dagoen ekonomia zirkularreko hub-ean (Miramon Parke Teknologikoa), proiektua gauzatzen den bitartean.               

5.    Ebaluazio batzordea.

Ebaluazio batzorde bat izendatuko da:

— ETEek aurkezturiko proposamenak baloratzeko, bai erronka, bai proposaturiko soluzioa.

— Batzorde hori osatuko dute Gipuzkoako Aldaketa Klimatikoaren Fundazioa/Fundación de Cambio Climático de Gipuzkoa erakundeko talde teknikoak eta Gipuzkoako Foru Aldundiko Ingurumeneko eta Obra Hidraulikoetako Departamentuko Ingurumen Zuzendaritza Nagusiko teknikariek.

Batzordeak erabaki dezake sariak eman gabe uztea, hautagaiek ez badute eskatzen den kalitaterik. Hori behar bezala arrazoitu beharko da.

6.    Instrukzioa.

Sari horiek emateko prozeduraren instrukzioa Gipuzkoako Aldaketa Klimatikoaren Fundazioa/Fundación de Cambio Climático de Gipuzkoa erakundeko talde teknikoak eta Gipuzkoako Foru Aldundiko Ingurumeneko eta Obra Hidraulikoetako Departamentuko Ingurumeneko Zuzendaritza Nagusiko teknikariek egingo dute.

Ofizioz egingo dira ebazpen proposamena egiteko erabili behar diren datuak zehazteko, ezagutzeko eta egiaztatzeko beharrezkotzat jotzen diren jarduketa guztiak.         

7.    Sariak ematea.

Sariak emateko prozedura lehia izango da, Gipuzkoako Aldaketa Klimatikoaren Fundazioa/Fundación de Cambio Climático de Gipuzkoa fundazioaren patronatuak eginiko deialdiaren bidez.

Gipuzkoako Aldaketa Klimatikoaren Fundazioa/Fundación de Cambio Climático de Gipuzkoa fundazioko patronatuaren deialdian hainbat gai zehaztuko dira: aurkezteko epea, aurkeztu beharreko dokumentazioa, ebaluazio batzordearen osaketa eta aurrekontu kredituak.

Aukeraketa egiteko printzipio hauek hartuko dira aintzat: publizitatea, gardentasuna, lehia, objektibotasuna, berdintasuna, koherentzia eta diskriminaziorik eza.

Ebaluazio batzordeak balorazio irizpide hauek hartuko ditu kontuan aurkezturiko proiektuak ebaluatzerakoan:  

— Berrikuntza zirkularra (40 puntu bitarte).

Planteatzen den erronkari irtenbidea emateko gaitasuna, proposamenaren alderdi teknikoak zehaztuz (kalitatea eta bideragarritasun teknikoa) eta horrek dituen ezaugarri bereizleak zehaztuz.

Halaber, proiektuak ekonomia zirkularraren printzipioekin duen garrantzia eta lotura ebaluatuko da, eta ekintzak lehenetsiko dira Europako hondakinen hierarkian (2008/98/EE Zuzentaraua) ezarritako irizpideen arabera:

— Prebentzioa.

— Berrerabiltzea.

— Birziklatzea.

— Balorizazioa (energiaren antzeko helburuetarako).

— Ezabatzea.

Ekodiseinuko ekimenak eta proiektuak hondakinen prebentzioaren kategorian sartuko dira.

Irizpide honen arabera, enpresen arteko lankidetza ere baloratuko da, hau da, hainbat eragilek batera egiten dituzten proiektuen proposamenak. Azken alderdi honi gehienez 3 puntu emango zaizkio.

— Negozio eredua eta bideragarritasun ekonomikoa (20 puntu bitarte).

Enpresa-ereduaren kalitatea eta koherentzia bere balio-proposamena monetizatzeko (nola lortzen duen itzulkin ekonomikoa), eta argi eta garbi identifikatzea beharrezko baliabideak, gastuen egitura eta diru-sarreren iturriak, bideragarria eta ekonomikoki jasangarria izan dadin.

— Ekintzaileen taldea eta orientazioa (20 puntu bitarte).

Talde ekintzailearen kualifikazioa (sektorean esperientzia izatea, trebetasunen oreka, profil ekintzailea, merkatuaren ezagutza, lidergo-gaitasuna, proiektua aurrera eramateko motibazioa), eta talentu ekintzailea negozioaren ideia garatzeko zenbateraino sartu eta dedikatu den. ETEen kasuan, enplegatuek ideia berriaren garapenean zuzenean parte hartzea baloratuko da, bereziki proposamena enplegatuengandik berengandik etorriko balitz, eta lanpostu berriak sortzea, ETEtik kanpoko pertsona ekintzaileak sartuz ideia garatzeko.               

— Lurraldean duen eragina (20 puntu bitarte).

Proiektuaren eragina eta onurak Gipuzkoako Lurralde Historikoan, ingurumenari (klima-aldaketaren aurkako borroka), gizarteari eta ekonomiari dagokienez.

Saria emateari edo, hala badagokio, saria ez emateari buruzko erabakia Gipuzkoako Aldaketa Klimatikoaren Fundazioa/Fundación Cambio Climático de Gipuzkoa Fundazioaren patronatuari dagokio, eta Gipuzkoako Aldizkari Ofizialean eta beste hedabide batzuetan emango da argitara.

Ebazpena emateko eta argitaratzeko edo jakinarazteko gehieneko epea bi hilabetekoa izango da, eskabideak aurkezteko epea amaitzen denetik zenbatzen hasita.

8.    Sariak ordaintzea.

Sarien zenbateko ekonomikoa ordainduko zaie enpresa onuradunei, saria emateari buruzko erabakia jakinarazi eta berehala, betiere deialdiaren ekitaldian barrena. Saria ETE interesdunaren izenean dagoen bankuko kontuan ordainduko da, eta indarreko araudiak ezarritako atxikipena egingo zaio.  

9.    Proiektuaren garapena.

Sariak eskuratzen dituzten erakundeek 9 hilabeteko epea izango dute beren instalazioetan proiektua garatzeko. Horretarako, beren baliabide propioak eta azpiegitura edukitzeaz gain, Gipuzkoako Aldaketa Klimatikoaren Fundazioa/Fundación de Cambio Climático de Gipuzkoa fundazioaren laguntza ere izango dute, lanerako gune bat izango baitute fundazioaren egoitzan, eta hango zerbitzutarako sarbidea.              

9 hilabeteko epe horretan, enpresek harreman estua izango dute Gipuzkoako Aldaketa Klimatikoaren Fundazioa/Fundación de Cambio Climático de Gipuzkoa fundazioarekin, eta 3 hilabetean behin txosten labur bat egingo dute proiektuaren egoeraren berri emateko.

Erronkei emaniko soluzioek ez dute zertan oinarri teknologikodunak bakarrik izan beharrik, eta, era berean, helburu bakarra ere ez da originaltasuna. Soluzio horiek enpresak duen erronka konpondu behar dute, eta errepikagarriak izan behar dira arazo berak dituzten sektoreko beste enpresa batzuetan.

10.    Zabalkuntza eta publizitatea, eta jabetza intelektualaren eskubideak.

Gipuzkoako Aldaketa Klimatikoaren Fundazioa/Fundación de Cambio Climático de Gipuzkoa fundazioak eta deialdiaren ebaluazio batzordeak hitza ematen dute aurkezturiko hautagaien konfidentzialtasuna bermatuko dutela prozesu osoan barrena.

Parte-hartzaileek oinarri arautzaile hauek onartzeak dakar Gipuzkoako Aldaketa Klimatikoaren Fundazioa/Fundación de Cambio Climático de Gipuzkoa fundazioak publizitate eta zabalkuntzaren arloko jarduerak egiteko baimena izatea, soilik deialdiarekin loturiko informazioari dagokionez.               

Proiektuaren eskubideak eta haren edukiak, ETEan ezartzeko fasean garatu direnak, enpresa bakoitzarenak izango dira. Hala ere, horiek, gainera, lorturiko emaitzak zabaltzeko lanak ere egin ditzakete.               

Sarituak izan direla iragar dezakete saria jaso dutenek, egoera hori adieraziz idazpuru, iragarki eta memorietan. Era berean, sariak jaso izana zabaldu edo argitara dezakete edozein komunikabidetan.

11.    Datu pertsonalak tratatu eta babestea.

Abenduaren 5eko 3/2018 Lege Organikoa, Datu pertsonalak babesteari eta eskubide digitalak bermatzeari buruzkoa betez, jakinarazten da datu horiek tratatzearen arduraduna Gipuzkoako Aldaketa Klimatikoaren Fundazioa/Fundación de Cambio Climático de Gipuzkoa fundazioa dela, eta datu horiek tratatuko direla helburu hauekin: modu administratiboan kudeatzea lehiaketa honen fase guztiak, bai eta dagozkion sariak ematea ere, egonaldia Gipuzkoako Aldaketa Klimatikoaren Fundazioa/Fundación de Cambio Climático de Gipuzkoa fundazioaren egoitzan, eta lehiaketarekin loturiko komunikazio, informazio eta sustapeneko gainerako eginkizunak, oinarri arautzaile hauetan aurreikusitako baldintzak betez.

Informazio hori Gipuzkoako Aldaketa Klimatikoaren Fundazioa/Fundación de Cambio Climático de Gipuzkoa fundazioak tratatu eta gordeko du, legez eska daitezkeen segurtasun neurrien bidez. Segurtasun neurri horiek teknikoak eta antolaketari dagozkionak izango dira, eta informazioaren segurtasuna bermatuko dute, hau da, bermatuko dute informazio hori ez aldatzea, ez galtzea, edo baimenik gabe ez tratatzea edo eskuratzea. Teknologiaren egoeraren eta datuen izaeraren arabera eta datuek izan ditzaketen arriskuen arabera tratatu eta gordeko da informazioa.

Gipuzkoako Aldaketa Klimatikoaren Fundazioa/Fundación de Cambio Climático de Gipuzkoa fundazioak datuak gordeko ditu lehiaketako partaidetza kudeatzeko beharrezkoa den denboran. Ez dizkie datu horiek hirugarren batzuei jakinaraziko.

Interesdunek datuak eskuratzeko, zuzentzeko, ezabatzeko edo datuen eramangarritasunerako aurreikusten diren eskubideak gauza ditzakete, eta, era berean, datuak tratatzea mugatzeko edo datuak tratatzearen kontra egiteko eskubidea ere, eskaera bat zuzenduz Gipuzkoako Aldaketa Klimatikoaren Fundazioa/Fundación de Cambio Climático de Gipuzkoa erakundera, deialdiaren oinarrietan adierazitako edozein bide erabiliz (aurrez-aurrekoak edo digitalak).

12.    Informazio osagarria.

Informazio gehiago nahi izanez gero edo deialdiari buruzko zalantzak argitzeko Gipuzkoako Aldaketa Klimatikoaren Fundazioa/Fundación de Cambio Climático de Gipuzkoa fundazioari zuzenean galde dakioke:

Gipuzkoako Aldaketa Klimatikoaren Fundazioa / Fundación de Cambio Climático de Gipuzkoa (Naturklima).

Mikeletegi Pasealekua, 65 - B2 eraikina. 0 Solairua. 20009 Donostia.

Ordutegia: Astelehenetik ostiralera, 8:00etatik - 15:30era.

Posta elektronikoa: m.iglesias@naturklima.eus.

Telefonoa: 943.005.085.

Web: https://www.naturklima.eus/

13.    Araubide juridiko aplikagarria.

Oinarri hauetan aurreikusitakoaz gain, Gipuzkoako Lurralde Historikoko dirulaguntzei buruzko martxoaren 27ko 3/2007 Foru Araua aplikatuko da.

Oinarri hauetan araututako sariak ez dira estatuko laguntzak Europar Batasunaren Funtzionamenduari buruzko Itunak 107. artikuluko 1. puntuan xedatutakoaren arabera, estatu kideen arteko merkataritza trukatzeei ez baitiete eragiten. Izan ere, diruz lagundu daitezkeen jarduerek tokiko izaera nabarmena daukate eta laguntza horien onuradunak tokiko erakundeak izango dira, euren eskumen propio eta legitimoen barruan, interes orokorrean oinarritu behar dira.