GAO

LEGAZPIKO UDALA

Iragarkia

Legazpiko Udal-korporazioaren Osoko Bilkurak, 2021-09-29an egin zuen ohiko bileran, Toki-araubidearen Oinarriak arautzen dituen 7/85 Legearen 47.2 artikuluan aurreikusitako gehiengoarekin, hasierako onespena eman zion «Udalerriko aparkaleku publikoetan eta beste kale batzuetan egokitutako eremuetan trakzio mekanikodun ibilgailuen estazionamendu arautua mugatzeko eta antolatzeko zerbitzu publikoa arautuko duen Ordenantza»ri.

Hasiera bateko onespenaren iragarkia 2021-10-29ko Gipuzkoako Aldizkari Ofizialean argitaratu zen.

Jendeaurreko informazio-epea amaiturik eta alegazioak aurkeztu ez direla ikusi ondoren, aipatu araudiaren aldaketa behin betiko onespena jaso duela ulertzen da, beraz argitaratzen da.

Legazpi, 2022ko maiatzaren 5a.—Koldobike Olabide Huelga, alkatea.            (2857)

Udalerriko aparkaleku publikoetan eta beste kale batzuetan egokitutako eremuetan trakzio mekanikodun ibilgailuen estazionamendu arautua mugatzeko eta antolatzeko zerbitzu publikoa arautuko duen Ordenantza.          

I. TITULUA

EUSKAL HERRIA PLAZAN ETA UROLA KALEA 8-C
(PAPER-FABRIKA) EREMUAN ORDUTEGI MUGATUA DUTEN APARKALEKU PUBLIKOAK ARAUTZEA

1. artikulua.    Xedea.

Hauxe da Ordenantzaren atal honen xedea: trafikoa antolatzen eta hobetzen laguntzea, 6 metroko luzera eta 3.500 kg-ko pisua gainditzen ez duten trakzio mekanikoko ibilgailuen aparkalekua aldi baterako mugatuz, honako aparkaleku publikoetan: Euskal Herria plaza eta Urola kalea 8-C (paper-fabrika).       

2. artikulua.    Ordutegia.

Aipatu bi aparkaleku publikoetan estazionamendu mugatuaren funtzionamendurako ezartzen den ordutegia honako hau da:

— Euskal Herria plaza: 08:00etatik 21:00etara.

— Urola kalea 8-C: 06:00etatik 22:00etara.

Ordutegi hori Alkate-udalburuaren dekretuaren bidez aldatu ahal izango da.

3. artikulua.    Aparkatzeko baldintzak.

Aipatutako aparkaleku publikoetan aparkatzeko, arau orokor eta partikular guztiak betetzeaz eta ibilgailuak aparkatzeari buruzko seinaleak betetzeaz gain, honako baldintza hauek bete beharko dira:             

1.    Tiketa eskuratzea, dagokion denbora-muga eta ibilgailuaren matrikula zuzena adieraziko duena; tiketa horretarako instalatuko diren parkimetroetan aterako da.

2.    Tiketa ibilgailuan ikusteko moduko leku batean jartzea.

3.    Ibilgailuak aparkatuta egoteko duen denbora igaro ondoren, ibilgailua kendu egin beharko da. Berriro aparkatu ahal izateko, 2 ordu igaro beharko dira.

Baimendutako ibilgailuak bakarrik egongo dira aparkatzeko tiketa eskuratzetik salbuetsita.

4. artikulua.    Aparkatzeko denbora mugatzea.

Jarraian aparkatzeko denbora honela mugatzen da:          

— Euskal Herria plaza: 480 minutu (8 ordu).

— Urola kalea 8-C (paper-fabrika): 600 minutu (10 ordu).

5. artikulua.    Trafikoaren egoera bereziak.

Alkate-udalburuak, dagokion Udal Zerbitzuaren Arloak arrazoitutako proposamenaren arabera, eten egin ahal izango du Ordenantza honen aplikazioa, behar bezala arrazoitutako arrazoiengatik trafikoan eta/edo aparkalekuetan edozein modutan eragiten duten aldi edo egunetan.

6. artikulua.    Tasa.

Ordenantza honetan ezarri ez diren gainerako gauza guztietarako trafikoa arautzen duen Udal Ordenantzan eta hori garatzeko emango diren gainerako araudietan ezarritakoa beteko da.

Trakzio mekanikoko ibilgailuak aparkatzeko orduko tasa, ondoren zehazten diren ordu tarteen arabera finkatzen da:     

A.    Euskal Herria plazako lurpeko aparkalekua.

1.    Ordukako estazionamendua (gehienez 8 orduz jarraian aparkatzeko aukera).

a)    08:00etatik 21:00etara, ordu edo frakzio bakoitzeko 0,20 €.

b)  Legazpiko ibilgailuen zirkulazio-zergaren erroldan alta emandako ibilgailuen lehenengo bi orduak doan.              

c)    21:00etatik 08:00etara: doan.

B.    Urola kalea 8-C (paper-fabrika), gehienez 10 orduz jarraian aparkatzeko aukera.

a)    6:00etatik 22:00etara: doan.

b)    22:00etatik 6:00etara: doan.

II. TITULUA

PLAZAOLA KALEAN EGOILIARRENTZAKO ETA ZAMALANETARAKO DAUDEN PLAZAK ARAUTZEA

7. artikulua.    Xedea.

Hiriguneko kaleak erabat edo zati batean oinezkoentzat egokitu direnez, kendu diren aparkalekuen ordez bestelako aukerak eskaintzeko, Plazaola kalean (1etik 11ra) aparkalekuak jarri dira:

— Txandakako 69 aparkaleku-plaza, egoiliar-txartela lortu nahi dutenek bakarrik erabiltzekoak.  

— Zamalanetarako soilik erabiliko diren 24 aparkaleku-plaza. Ordutegia:

Lanegunetan: 08:00etatik 13:00etara eta 16:00etatik 19:00etara.

Larunbatetan: 9:00etatik 13:00etara.

8. artikulua.    Egoiliarrentzat gordetako eremua.

Horrela seinaleztatutako eremuan, Plazaola kalean (1etik 11ra), bakar-bakarrik ondorengo kaleetan erroldatuta dauden pertsonen trakzio mekanikoko ibilgailuak aparkatu ahalko dira: Kale Nagusia, Nafarroa kalea, P. Etxeberria, Aizkorri kalea 1etik 12ra, Plazaola kalea 1etik 11ra, Saturnino Telleria 6 eta 7 eta Santikutz kalea 1, 2, 3, 4, 6 eta 8. Horretarako ezinbestekoa izango da eskaera egitea eta egoiliarraren bereizgarria edo txartela izatea.

Ordenantza honetan zehaztutako bereizgarria jasoko dutenek egoiliarrentzat gordetako eremuetan aparkatu ahal izango dute, gehienez ere 5 egunez jarraian, ezinbesteko arrazoiengatik jasotako berariazko baimenik izan ezean; baimen hori alkate-udalburuak emango du.

5 egunak igaro ondoren, ibilgailua beste aparkaleku-plaza batera eraman beharko da.

9. artikulua.    Egoiliarraren bereizgarria.

Baldintza hauek batetzen dituzten trakzio mekanikoko ibilgailuen titularrek lortu ahal izango dute egoiliarraren bereizgarria edo txartela, aldez aurretik eskatuta:

— Ibilgailuaren titularrak honako kaleetako helbide batean egon behar du erroldatuta: Kale Nagusia, Nafarroa kalea, P. Etxeberria, Aizkorri kalea 1etik 12ra, Plazaola kalea 1etik 11ra, Saturnino Telleria 6 eta 7 eta Santikutz kalea 1, 2, 3, 4, 6 eta 8.

— Ibilgailuen zirkulazioaren gaineko zergaren Legazpiko Erroldan alta emanda egon behar du.

— Udalak ezarritako trafikoko zehapenen ordainketak egunean izan behar ditu, halakorik badu.

— Legazpiko Udalarekin dituen betebeharrak egunean izan behar ditu.

Horrek guztiak ez du eragotziko bereizgarri bereziak ematea, mugikortasun murriztua izateagatik edo alkate-udalburuak aintzat hartutako salbuespenezko beste arrazoi batengatik.

10. artikulua.    Egoiliarraren bereizgarria eskatzea.

Egoiliarraren bereizgarria eskuratu nahi dutenek agiri hauek aurkeztu beharko dituzte:

— Horretarako ezarritako eskaera.

— NANaren eta ibilgailuaren zirkulazio-baimenaren fotokopia.

11. artikulua.    Egoiliarraren bereizgarriaren erabilera eta indarraldia.

Urtebetekoa izango da egoiliarraren bereizgarriaren indarraldia, eta hurrengo urtean berriro eskatu beharko da.

Errolda-datuak edo ibilgailuarenak aldatuko balira, beste bereizgarri edo txartel bat eskatu behar da.

Bereizgarriak eskuratzeko eskarien arabera, aparkalekuak txandakatzeko sistema bat gaitu ahal izango da, matrikula bikoitiak / matrikula bakoitiak aparkatzeko sistemaren bidez. Alkate-udalburuak onartuko du aparkalekuak txandakatzeko sistema hori.

12. artikulua.    Tasak.

Ordenantza honetan ezarri ez diren gainerako gauza guztietarako trafikoa arautzen duen Udal Ordenantzan eta hori garatzeko emango diren gainerako araudietan ezarritakoa beteko da.

Egoiliarrentzat gordetako eremuan trakzio mekanikoko ibilgailuak aparkatzeagatiko tasa 50 €-koa izango da urteko.

Ez da ordaindu beharko zamalanetarako gordetako eta behar bezala seinaleztatutako lekuetan ibilgailua aparkatzeagatik.              

III. TITULUA

UDALERRIKO BESTE KALE BATZUETAN EGOKITUTAKO APARKALEKUAK ARAUTZEA

13. artikulua.    Xedea.

Hauxe da Ordenantzaren atal honen xedea: trafikoa antolatzen eta hobetzen laguntzea, 6 metroko luzera eta 3.500 kg-ko pisua gainditzen ez duten trakzio mekanikoko ibilgailuen aparkalekua espazioan eta denboran mugatuz, udalerriko beste kale batzuetan egokitutako aparkalekuetan.    

Ez da ordaindu beharko ibilgailua Titulu honetan araututako aparkaleku gisa behar bezala seinaleztatutako lekuetan aparkatzeagatik.

14. artikulua.    Ordutegia.

Herriko kale desberdinetan eta haien ezaugarrien arabera denbora mugatuan aparkatzeko dauden lekuetarako ezarritako ordutegia ondorengoa da:

Kultur Etxeko aparkalekua.

— Astelehenetik ostiralera, 09:00etatik 17:00etara.

— Larunbatetan, 09:00etatik 13:00etara.

Juanastegi kaleko aparkalekua.

— Astelehenetik ostiralera, 09:00etatik 20:00etara.

Plazaola kaleko aparkalekua (Mauleon hotelaren ondoan).

— Astelehenetik ostiralera, 09:00etatik 20:00etara.

— Larunbatetan, 09:00etatik 13:00etara.

Laubide auzoko Eroski pareko aparkalekua.

— Astelehenetik ostiralera, 09:00etatik 20:00etara.

— Larunbatetan, 09:00etatik 13:00etara.

Fleming kaleko BM aparkalekua.

— Astelehenetik ostiralera, 09:00etatik 20:00etara.

— Larunbatetan, 09:00etatik 13:00etara.

Ordutegi hori Alkatetzaren dekretuaren bidez aldatu ahal izango da.

15. artikulua.    Parkimetroa duten eremuetan aparkatzeko baldintzak.

Parkimetroarekin araututako aparkelkuetan aparkatzeko, arau orokor eta partikular guztiak betetzeaz eta ibilgailuak aparkatzeari buruzko seinaleak betetzeaz gain, honako baldintza hauek bete beharko dira:    

1.    Tiketa eskuratzea, dagokion denbora-muga eta ibilgailuaren matrikula zuzena adieraziko duena; tiketa horretarako instalatuko diren parkimetroetan aterako da, beharrezkoa izango da tiketa ibilgailuaren aurrealdean erakustea.

2.    Ibilgailuak aparkatuta egoteko duen denbora igaro ondoren, ibilgailua kendu egin beharko da. Berriro aparkatu ahal izateko, 2 ordu igaro beharko dira.

16. artikulua.    Aparkatzeko denbora mugatzea.

Aparkatzeko denbora-muga bat egongo da. Muga hori 60 minutukoa (ordubete) izango da, eta horrek ez du tasarik sortuko.

IV. TITULUA

ARAU-HAUSTEAK ETA ZIGORRAK

17. artikulua.    Kontrola.

Ordenantza bete egingo dela bermatzeko, kontrol zerbitzu bat ezarri da. Zerbitzu horrek beharrezko baliabide material eta giza baliabideak izango ditu.

18. artikulua.    Arau-hausteak.

Ordenantza honetan ezarritako edozein artikulu edo bere garapenerako Alkate-udalburuak emandako gainerako xedapenak urratzea, trafikoa eta zirkulazioa antolatzeko arauen aurkako arau-haustetzat joko da eta, horrelakoetan, zigorrak ezarriko dira, legez ezarrita dagoen prozeduraren bidez.            

Arau-hausteak izango dira ondoko hauek:

a)    Aparkatzeko tiketean jasotako ordu-muga gainditzea.               

b)    Balio ez duen tiketa edo matrikula okerra erabiltzea.

c)    Tiketa edo egoiliarraren bereizgarria ez izatea.

d)    Tiket edo egoiliarraren bereizgarri manipulatua, faltsutua, iraungita edo desegokia erabiltzea.

e)    Egoiliarrentzat gordetako eremuan aparkatzea, egoiliarraren bereizgarririk gabe.

f)    Ibilgailuaren jabetza transferitu ondoren, harentzako emandako egoiliarraren bereizgarria erabiltzea.

g)    Egoiliarrentzako gordetako eremuan jarraian aparkateko 5 egunak gainditzea.

h)    Bereizgarria edo baimen-txartela izanda ere, hori ez erakustea.

i)    Aparkaleku-plaza bat baino gehiago okupatzea.

19. artikulua.    Zigorrak.

Aurreko artikuluan tipifikatu diren arau-hausteak 30 €-ko isunarekin zigortuko dira.

Aipatu artikuluaren a, b, c, d eta g ataletan tipifikatu diren arau-hausteen kasuan, eta estazionamenduaren neurriz gaineko erabilerarengatik gehiegikeriaz jokatzea badakarte –tiketarik gabe 24 ordutan aparkatuta egotea–, udal-agintaritzak berreskuratu egingo du era ez-egokian okupatutako espazio publikoaren erabilera librea, bertan dagoen ibilgailua hortik kendu eta udal-gordailura eramanez, ezar daitekeen diru-zigorra gorabehera.               

Ibilgailua bide publikotik edo aparkalekutik kentzeko zerbitzuak eta udal-gordailuan egingo den egonaldiak, Ordenantza Fiskalean horretarako ezarritako tasak sortuko dituzte.

20. artikulua.    Salaketaren aurretiko ordainketa.

Parkimetroaren bidez kudeatzeko sistemak, aukera ematen du Ordenantza honetako 11. artikuluko a, b eta c motetako arau-hausteak egiteagatik egindako salaketen zenbatekoa aldez aurretik ordaintzeko, baldin eta ordainketa hori tiketean jasotako denbora amaitzen denetik 24 ordu baino gehiago igaro baino lehen egiten bada, eta, nolanahi ere, dagozkion zerbitzuek oraindik ibilgailua inmobilizatu edo kendu ez badute egin. Ordainketa horrek ez du esan nahi salatutako ibilgailua dagoen lekuan aparkatuta jarraitu dezakeenik, eta, beraz, berehala kendu beharko da bertatik; bestela, inmobilizatu edo bide publikotik kendu ahal izango da, Trafikoari, Ibilgailu Motordunen Zirkulazioari eta Bide Segurtasunari buruzko Legearen testu artikulatua onartzen duen urriaren 30eko 6/2015 Legegintzako Errege Dekretuaren.º 104. eta 105. artikuluetan ezarritakoaren arabera.           

Aurretiko ordainketa parkimetroetan bertan egiten da.

Salaketaren aurretiko ordainketaren zenbatekoak honako hauek dira:

a)    Aparkatzeko tiketean jasotako ordu-muga gainditzea (10,00 €).

b)    Tiketa ez izatea edo balio ez duen tiketa erabiltzea (10,00 €).

c)    Egoiliarren eremuan aparkatzea, ez dagokionean edo 5 egun jarraian baino gehiago (10,00 €).

Baimendutako eremuetan denbora hori gainditzeak, Ordenantza Fiskalean jasotako tasa sortuko du ordu bakoitzeko.   

21. artikulua.    Zigor-prozedura arrunta Arau-hausteak.              

Ordenantza honetan ezarritako edozein artikulu edo bere garapenerako Alkate-udalburuak emandako gainerako xedapenak urratzea, trafikoa eta zirkulazioa antolatzeko arauen aurkako arau-haustetzat joko da eta, horrelakoetan, zigorrak ezarriko dira, legez ezarrita dagoen prozeduraren bidez.            

Xedapen indargabetzailea.

Indargabetuta geratzen da 2015eko maiatzaren.º 19ko Gipuzkoako Aldizkari Ofizialean argitaratutako ordenantza, bai eta ordenantza honetan xedatutakoaren aurka dauden gainerako udal-xedapen guztiak ere.

Azken xedapena.

Ordenantza hau Gipuzkoako Aldizkari Ofizialean argitaratu eta hurrengo egunean sartuko da indarrean.